Gjykata e Lartë në Spanjë kufizon “kthimet e menjëhershme” në Ceuta dhe Melilla

Presioni i lartë migrator mbi Ceutën ka rikthyer në qendër të debatit politik në Spanjë çështjen e “devoluciones en caliente”, pra kthimeve të menjëhershme të emigrantëve në kufi, pas një vendimi të fundit të Gjykatës së Lartë spanjolle që kufizon përdorimin e kësaj procedure.

Që prej ditës së djeshme, mijëra persona kanë tentuar të hyjnë në enklavën spanjolle të Ceutës nga territori i Marokut, kryesisht duke kaluar me not pjesën detare që ndan dy brigjet. Autoritetet flasin për një numër të madh mbërritjesh, ndërsa bilanci i viktimave pritet të rritet me kalimin e orëve.

Situata e krijuar vjen vetëm disa javë pas vendimit të Gjykatës së Lartë të Spanjës, e cila sqaroi kufijtë e zbatimit të kthimeve të menjëhershme në kufi. Vendimi lidhet me një dispozitë të Ligjit për të Huajt, e miratuar në vitin 2015 posaçërisht për Ceutën dhe Meliljen, që lejon kthimin e menjëhershëm të personave të kapur teksa përpiqen të kalojnë barrierat fizike kufitare.

Gjykata vendosi më 29 qershor 2026, në një vendim të bërë publik më 8 korrik, se kjo procedurë mund të përdoret vetëm kur emigranti tenton të kapërcejë një pengesë fizike, siç janë gardhet kufitare që rrethojnë dy enklavat spanjolle në Afrikën e Veriut.

Sipas gjykatës, kalimi me not drejt Ceutës nuk konsiderohet kapërcim i një barriere fizike dhe për këtë arsye personat e ndaluar në det nuk mund të kthehen menjëherë në Marok. Në këto raste autoritetet spanjolle duhet të ndjekin procedurën e zakonshme: identifikimin e emigrantëve, vlerësimin individual të situatës, ofrimin e ndihmës ligjore dhe mundësinë për të kërkuar mbrojtje ndërkombëtare.

Vendimi i Gjykatës së Lartë i dha fund një procesi të nisur nga një shtetas algjerian, i cili në vitin 2024 kishte mbërritur në Ceuta duke notuar dhe ishte kthyer menjëherë në Marok pa pasur mundësi të kërkonte azil.

Gjykata theksoi se mjetet e mbikëqyrjes si helikopterët, dronët, radarët, kamerat apo patrullimet detare nuk mund të konsiderohen barriera fizike, pasi ato vetëm zbulojnë tentativat e kalimit, por nuk e pengojnë materialisht hyrjen.

Vendimi ka ndryshuar mënyrën e menaxhimit të flukseve migratore në Ceuta, ndërsa autoritetet përballen tashmë me një valë të re mbërritjesh nga Maroku, ku shumë emigrantë po përpiqen të arrijnë territorin spanjoll përmes detit.