E premte, 20 Nëntor 2026
54°F Detroit
Ballina›Bota›Alarm për sulm ajror në Poloni, aktivizohen sirenat pas dyshimeve për shkelje të hapësirës ajrore

Alarm për sulm ajror në Poloni, aktivizohen sirenat pas dyshimeve për shkelje të hapësirës ajrore

Një alarm për rrezik sulmi ajror është dhënë mëngjesin e kësaj të premte në Poloni, pasi autoritetet raportuan dyshime për shkelje të hapësirës ajrore të vendit nga objekte fluturuese të paidentifikuara. Si masë paraprake, sirenat e alarmit u aktivizuan në qytetin e Rzeszow, ndërsa banorët e disa zonave morën njoftime urgjente nga Qendra Qeveritare e Sigurisë (RCB), ku u kërkohej të gjenin një vend të sigurt dhe të ndiqnin udhëzimet e autoriteteve.

Alarmi u lëshua pak pas orës 06:40 dhe përfshiu disa qarqe në rajonet e Lublinit dhe Podkarpackie, në juglindje të Polonisë. Në njoftimin drejtuar qytetarëve thuhej: “Kujdes! Rrezik sulmi ajror. Gjeni një vend të sigurt. Ndiqni udhëzimet e autoriteteve dhe prisni njoftime të mëtejshme”.

Komanda Operacionale e Forcave të Armatosura të Polonisë bëri të ditur se informacioni për kërcënimin e mundshëm ajror ishte përcjellë pas dyshimeve për një shkelje të hapësirës ajrore polake nga objekte të paidentifikuara. Sipas autoriteteve, po kryhej verifikimi i të dhënave të sistemeve të radarit, me qëllim konfirmimin e situatës dhe marrjen e masave të nevojshme për neutralizimin e çdo kërcënimi të mundshëm.

Në kuadër të masave të sigurisë, u aktivizuan edhe ekipet e kërkim-shpëtimit, përfshirë në qarkun Biłgoraj, ku po verifikohen raportimet për rënien e mundshme të një objekti në zonën e Chmielek. Lajmi u konfirmua nga nënkoloneli Jacek Goryszewski, zëdhënës i Komandës Operacionale të Forcave të Armatosura, për televizionin TVN24. Ndërkohë, në internet janë publikuar pamje që pretendohet se tregojnë një shpërthim në zonë.

Një tjetër masë e pazakontë ishte evakuimi i kullës së kontrollit të trafikut ajror në aeroportin Rzeszow-Jasionka. Agjencia Polake e Shërbimeve të Navigimit Ajror (PANSA) vendosi për herë të parë të evakuojë këtë strukturë për shkak të kërcënimit të raportuar. Nëntë persona, mes tyre gjashtë punonjës të stafit operacional, u sistemuan në një strehim të përkohshëm.

Megjithatë, rreth orës 07:30, autoritetet njoftuan anulimin e alarmit. Banorët morën një mesazh të ri nga RCB, ku thuhej se kërcënimi për sulm ajror ishte anuluar dhe se nuk kishte rrezik në territorin e Polonisë. Pak minuta më vonë, në orën 07:34, sirenat në Rzeszow dhanë sinjalin e përfundimit të alarmit.

Më herët gjatë natës, rreth orës 02:30, një tjetër paralajmërim ishte dërguar për banorët e disa zonave në rajonin e Lublinit dhe në pjesën më të madhe të Podkarpackie, për shkak të sulmeve ajrore ruse në Ukrainë. Në mesazh bëhej e ditur se situata po monitorohej dhe se ishte rritur niveli i gatishmërisë së sistemit polak të mbrojtjes ajrore.

An explosion was captured on CCTV at approximately 6:35 AM near Chmielek, in Biłgoraj County, eastern Poland. The explosion is visible on the right-hand side of the footage, which appears to show a sudden flash followed by a blast. Chmielek is located approximately 97 km from Lublin in a straight line, or around 110–120 km by road.

Lini një koment