El-Sayed tërheq kritikat për Obamën dhe kërkon ndjesë për komentin mbi të shtënat në sinagogë

Kandidati demokrat për Senatin amerikan në Michigan, Abdul El-Sayed, zbuti kritikat e ashpra që i kishte drejtuar dikur presidentit Barack Obama, në një intervistë në emisionin “Meet the Press” të NBC-së, siç njofton USA Today.

Moderatorja Kristen Welker e pyeti për deklaratat e vitit 2012, kur ai kishte thënë se Obama “përjetësoi luftën” dhe “shkeli liritë civile”, duke shtuar se “lista e dështimeve të tij vazhdon”.

El-Sayed u përgjigj se Obama u përball “me një grup rrethanash vërtet të vështira dhe bëri më të mirën”, duke e krahasuar me marrëdhënien e tij me të atin: pa përpjekjet e babait nuk do të kishte jetën që gëzon, por shumë gjëra do t’i bënte ndryshe.

“Ai bëri më të mirën me rrethanat që kishte, dhe është mundësia për ta përcjellë te një brez tjetër udhëheqësish”, tha kandidati demokrat në intervistë.

Intervista vjen pak javë para tubimit të 24 tetorit në Detroit, ku Obama do të dalë krah El-Sayed dhe Jocelyn Benson, kandidates demokrate për guvernatore të Michiganit.

El-Sayed garon kundër ish-kongresmenit republikan Mike Rogers, i cili në vitin 2024 humbi ndaj senatores Elissa Slotkin me më pak se gjysmë përqindjeje, ndërsa Trump fitoi Michiganin me mbi një pikë përqindjeje.

Gjatë intervistës, Welker e pyeti El-Sayed edhe për reagimin e tij pas sulmit në një sinagogë të Michiganit në mars, kur ai dënoi të shtënat, por shtoi se “njerëzit e lënduar lëndojnë të tjerët”, duke iu referuar faktit se sulmuesi kishte humbur të afërm në një sulm izraelit në Liban. Komenti u kritikua nga disa banorë hebrenj të Michiganit, mes tyre edhe prokurorja e përgjithshme demokrate Dana Nessel.

El-Sayed kishte kërkuar ndjesë edhe më herët, duke thënë se po përpiqej të ofronte kontekst, por “nuk ishte koha për kontekst”. Në intervistën për NBC-në ai përsëriti ndjesën dhe tha se foli edhe me senatoren Slotkin, e cila është hebreje, për këtë koment: “Pendohesha sa herë që shkel mbi dhimbjen e dikujt”, tha El-Sayed.