Ish-kryebashkiaku i Xheksonit dënohet me 37 muaj burg federal për ryshfet
Ish-kryebashkiaku i Xheksonit (Jackson), Misisipi, Chokwe Antar Lumumba, u dënua të premten, më 20 nëntor, me 37 muaj burg federal, pasi në korrik u deklarua fajtor për komplot për ryshfet, mashtrim elektronik dhe pastrim parash, siç njofton The Hill.
Dënimin e dha gjyqtari federal Daniel P. Jordan III. Përveç burgut, Lumumba do të ketë edhe një vit liri me mbikëqyrje pas daljes nga burgu dhe duhet të heqë dorë nga 50 mijë dollarë. Sipas Associated Press, atij i është rekomanduar të paraqitet në burg më 4 janar 2027.
Skema, sipas akuzës, nisi kur dy persona që punonin për FBI-në u paraqitën si zhvillues pasurish të paluajtshme dhe i dhanë Lumumbës 50 mijë dollarë për fushatën e rizgjedhjes, në këmbim të përshpejtimit të afatit për një projekt hoteli në qendër të qytetit. Aktakuza ndaj tij u ngrit në nëntor 2024.
Në të njëjtin rast u dënuan edhe dy të bashkakuzuar: ish-prokurori i qarkut Hinds, Jody Owens, mori 41 muaj burg, ndërsa ish-kryetari i këshillit bashkiak, Aaron Banks, u dënua me 45 muaj burg.
Lumumba shërbeu dy mandate si kryebashkiak i Xheksonit, nga viti 2017 deri në vitin 2025, dhe u bë kryebashkiaku më i ri në historinë e qytetit kur u zgjodh në moshën 34-vjeçare. Ai është djali i ish-kryebashkiakut Chokwe Lumumba, i cili vdiq më 2014. Lumumba humbi rizgjedhjen më 2025, pasi kishin dalë akuzat, dhe gjatë mandatit të tij qyteti kaloi krizën e ujit të vitit 2022, kur mbi 150 mijë banorë mbetën pa ujë të sigurt për muaj.