E martë, 17 Nëntor 2026
54°F Detroit
Ballina›Kosova›Samiti BE–Ballkani Perëndimor: Kosovës dhe Serbisë pritet t’u kërkohet përparim në dialog

Samiti BE–Ballkani Perëndimor: Kosovës dhe Serbisë pritet t’u kërkohet përparim në dialog

Sipas draft-deklaratës të cilën e ka parë Radio Evropa e Lirë, liderët e vendeve anëtare të Bashkimit Evropian do të shfrytëzojnë samitin e ardhshëm BE–Ballkani Perëndimor, që mbahet më 25 nëntor në Bruksel, për të paralajmëruar se mungesa e normalizimit të marrëdhënieve ndërmjet Prishtinës dhe Beogradit vazhdon t’i pengojë të dyja palët në rrugën e tyre drejt BE-së. Krerët e shteteve dhe të qeverive pritet të theksojnë se të gjitha marrëveshjet e arritura në dialogun e ndërmjetësuar nga BE-ja duhet të zbatohen.

Mesazhi pritet të jetë i drejtpërdrejtë edhe kur bëhet fjalë për mbështetjen financiare. “Mbështetja në kuadër të Instrumentit për Reforma dhe Rritje për Ballkanin Perëndimor [Plani i Rritjes] kushtëzohet me angazhimin konstruktiv të partnerëve, përparimin e matshëm dhe rezultatet konkrete në normalizimin e marrëdhënieve të tyre”, thuhet në draft-deklaratë, sipas Radio Evropa e Lirë.

Dialogu për normalizim ka ngecur prej vitesh. Liderët e Kosovës dhe të Serbisë nuk janë takuar që nga shtatori i vitit 2023, ndërsa shefja e politikës së jashtme të BE-së, Kaja Kallas, e cila është në detyrë që nga dhjetori i vitit 2024, nuk ka organizuar asnjë takim të nivelit të lartë. Pasi institucionet u stabilizuan në Kosovë dhe pas zgjedhjeve të parakohshme parlamentare në Serbi, të cilat i fitoi Lista e Studentëve, BE-ja do të përpiqet ta ringjallë dialogun sapo të formohet qeveria e re e Serbisë.

Deklarata pritet gjithashtu të përsërisë dënimin e lavdërimit të kriminelëve të luftës, mohimit të gjenocidit dhe revizionizmit, si qëndrime në kundërshtim me vlerat themelore evropiane, si dhe t’u bëjë thirrje palëve që të respektojnë vendimet e gjykatave ndërkombëtare dhe vendore për krimet e luftës.

Një kënd tjetër i rëndësishëm i samitit lidhet me Malin e Zi. Ky ka të ngjarë të jetë samiti i fundit BE–Ballkani Perëndimor për Malin e Zi si vend kandidat, pasi ai po punon për mbylljen e të gjitha kapitujve negociues dhe pritet t’i përfundojë negociatat për anëtarësim deri në fund të këtij viti, ndërsa nënshkrimi i Traktatit të Anëtarësimit pritet jo më herët se qershori i vitit të ardhshëm. Deklarata përfundimtare pritet ndërkaq të riafirmojë angazhimin e plotë të BE-së ndaj perspektivës së anëtarësimit të Ballkanit Perëndimor.

Lini një koment