Sheffield dhe shefi i policisë lavdërojnë programin “Occupy the Summer” për uljen e krimit në Detroit
Vrasjet e të miturve ranë me 89% gjatë verës, ndërsa kryebashkiakja foli për investimin historik prej 1.5 milionë dollarësh tek të rinjtë
Detroit — Kryebashkiakja e Detroitit, Mary Sheffield, dhe shefi i policisë, Todd Bettison, lavdëruan të hënën programin e bashkisë “Occupy the Summer” për uljen e ndjeshme të krimit në qytet gjatë verës, siç njofton Detroit Free Press.
Sipas shifrave të paraqitura nga zyrtarët, nga qershori në gusht vrasjet ranë me 25%, ndërsa vrasjet e të miturve u ulën me 89% krahasuar me të njëjtën periudhë të vitit të kaluar. Po ashtu, plagosjet e të miturve me armë zjarri ranë me 22% dhe vjedhjet e makinave me dhunë (carjacking) me gati 35%, njofton Free Press.
Sheffield foli të hënën në kompleksin Adams Butzel, ku e nisi programin në qershor, dhe e quajti “Occupy the Summer” një “investim historik prej 1.5 milionë dollarësh në të rinjtë tanë”. Ajo theksoi se programi nuk ishte reagim ndaj incidenteve të fundit, por vazhdimësi e një pune 12-vjeçare: “Nuk mund ta ndalojmë krimin vetëm me polici — duhet të investojmë, të mbështesim dhe t’u krijojmë mundësi të rinjve”, tha kryebashkiakja.
Shefi Bettison, i cili e quajti verën e vitit 2025 “të vështirë” për shkak të disa vrasjeve të të rinjve, tha se programi i ka dhënë “dividenda të jashtëzakonshme” në uljen e vrasjeve. “Gjatë verës kemi pasur vetëm një vrasje të një të mituri. Vitin e kaluar ishin nëntë. Kjo është rënie prej 89%”, tha Bettison.
Policia vuri fokus të veçantë te zbatimi i orës policore për të miturit këtë verë, pas incidenteve të “teen takeover” në qendër të qytetit. Policia e Detroitit lëshoi 85 shkelje të orës policore për të mitur — 28% më shumë se vitin e kaluar — dhe 44 gjoba për përgjegjësi prindërore, 25% më pak, sipas Detroit Free Press.
Përveç vrasjeve, Bettison raportoi rënie edhe në sulmet e rënda, grabitjet, vjedhjet, vjedhjet e makinave dhe plagosjet me armë. Sulmet seksuale u rritën me 5.8%, por shefi i policisë tha se qyteti po “shkon në drejtimin e duhur” në përgjithësi.
Në veçanti, zyrtarët theksuan suksesin kundër vjedhjeve të makinave me dhunë: nga titulli i dikurshëm “carjack city” me 800 raste në vitin 2013, qyteti e mbylli 2025 me 77 raste dhe është në rrugë për edhe më pak këtë vit — falë, sipas Bettison, inovacionit të departamentit dhe programit Project Greenlight, që mbledh pamje vëzhgimi nga bizneset partnere për zgjidhjen e krimeve.
Teferi Brent, drejtori i sigurisë së lagjeve në bashki, tha se qyteti po sheh “ulje të vrasjeve dhe të plagosjeve me armë, krahas uljes në çdo kategori kryesore të krimit”, duke shtuar se këto shifra “përfaqësojnë banorë të Detroitit që u kthyen në shtëpi, familje që nuk duhet të planifikojnë funeral”.
