Shqipëria i bashkohet nismës energjetike të Trump, mbështetje amerikane edhe për Skavicën
Shqipëria është bërë pjesë e nismës më të re të administratës amerikane për sigurinë energjetike. Siç njofton Shqiptarja.com, Ambasada e SHBA-së në Tiranë bëri të ditur se dje u firmosën në Shtetet e Bashkuara dy marrëveshje: përfshirja e Shqipërisë në iniciativën amerikane “Unleashing American Energy” dhe marrëveshja “Pax Silica”.
“Ambasada e SHBA-së mbështet objektivat e administratës Trump për të rritur sigurinë energjetike dhe zgjerimin e bashkëpunimit në sektorin e energjisë midis Shteteve të Bashkuara dhe Shqipërisë”, thuhet në deklaratën e ambasadës, e cila vë theksin edhe te mundësitë e reja për kompanitë shqiptare dhe amerikane.
Marrëveshja e dytë, “Pax Silica”, përfaqëson bashkëpunimin midis SHBA-së dhe Shqipërisë për projektin e hidrocentralit të Skavicës, një investim strategjik për sektorin e energjisë në vend, me vlerë 1.2 miliardë euro. Objektivi i saj është të sigurojë që SHBA-të do të vazhdojnë të ofrojnë teknologji, materiale, ekspertizë dhe mbështetje në këtë projekt.
Objektivi i nismës është të krijohet një kornizë e fortë për investimet energjetike dhe të mbrohet zinxhiri i furnizimit me burime minerale kritike, veçanërisht për produktet e teknologjisë së lartë dhe inteligjencës artificiale, duke përforcuar sigurinë kombëtare.
Në fjalën e saj, ambasadorja amerikane në Tiranë, Wendt, u shpreh se ky është një hap përpara për sigurinë e përbashkët energjetike dhe për një të ardhme me zhvillim të gjelbër për Shqipërinë, duke shtuar se me këto marrëveshje SHBA-të dhe Shqipëria po nxisin zhvillimin e sektorit të energjisë dhe sigurinë kombëtare.