E shtunë, 21 Nëntor 2026
54°F Detroit
Ballina›Arte›50 vite traditë pikture në Lezhë, 40 piktorë çelin ekspozitën në Galerinë e Arteve

50 vite traditë pikture në Lezhë, 40 piktorë çelin ekspozitën në Galerinë e Arteve

Në Galerinë e Arteve të Lezhës është çelur ekspozita vjetore e piktorëve lezhjanë, me 60 punime nga 40 piktorë, në kuadër të 50-vjetorit të krijimit të galerisë, siç njofton Shqiptarja.com. Ekspozita sjell sërish bashkë plejadën e piktorëve vendas, të cilët i dhanë jetë galerisë së qytetit.

Drejtori i Galerisë së Arteve, Llesh Nikolli, u shpreh se ekspozita është një manifestim jo vetëm i krijimtarisë, por edhe i pasionit të lindur për artin që ka shoqëruar artistët lezhjanë ndër vite, duke e cilësuar ngjarjen si të rëndësishme për galerinë që mbush 50 vite jetë. Sipas tij, ekspozita është një prezantim dinjitoz i artistëve lezhjanë dhe i vlerave të trashëgimisë artistike të qytetit.

Në ekspozitë marrin pjesë piktorë të njohur si Pashk Përvathi, Llesh Nikolli, Lekë Marku, Zef Celi dhe Alfred Mirashi, me punime të tematikave dhe zhanreve të ndryshme. Për Pashk Përvathin, një prej piktorëve më të njohur të qytetit, ekspozita është një udhëtim në kujtime: “Kjo ngjarje më duket si dje, kur sapo kisha mbaruar shkollën e mesme”, u shpreh ai, duke kujtuar vitet ’70, kur materialet dhe mundësitë për të ekspozuar ishin të pakta.

Tradita e pikturës në Lezhë daton që nga viti 1975, kur Galeria e Arteve u themelua nga një grup piktorësh të rinj të sapodiplomuar në Tiranë, të cilët u kthyen në qytetin e tyre për të kontribuar në zhvillimin e artit. Sot galeria ruan rreth 70 vepra, të cilat pasqyrojnë zhvillimin e artit në Lezhë ndër vite.

Ekspozita do të qëndrojë e hapur për publikun deri më 12 dhjetor.

Lini një koment