7 vatra zjarri aktive në vend! Mali i Dajtit, Dibra, Mati, Mirdita dhe Puka me situata më kritike
Ministria e Mbrojtjes mëngjesin e kësaj të marte ka dhënë informacionin zyrtar mbi situatën e zjarreve në territorin e vendit gjatë 24 orëve të fundit, ku nga 24 vatra të raportuara, 7 prej tyre vijojnë të mbeten aktive dhe 2 të tjera janë nën monitorim.
Për përballimin e emergjencave civile janë angazhuar 472 forca operacionale, 28 automjete zjarrfikëse, si dhe mbështetje e konsiderueshme nga Forcat e Armatosura me 140 efektivë në terren, 3 helikopterë dhe 2 avionë Air Tractor.
Operacionet më të mëdha po zhvillohen në zona si Mali i Dajtit, Gurë-Lurë në Dibër, Fushë-Lajë në Pukë, si dhe në Mat e Mirditë, ku terreni shkëmbor dhe era e fortë kanë vështirësuar ndërhyrjen e trupave.
Njoftimi i plotë i Ministrisë së Mbrojtjes:
Gjatë 24 orëve të fundit janë raportuar 24 vatra zjarri, nga të cilat 7 mbeten aktive dhe 2 janë në monitorim.
Për përballimin e situatës janë angazhuar 472 forca operacionale dhe 28 automjete zjarrfikëse, ndërsa Forcat e Armatosura kanë mbështetur operacionet me 129 efektivë, 3 automjete zjarrfikëse, 3 helikopterë dhe 2 avionë Air Tractor. Aktualisht në terren operojnë 140 efektivë të FA, 1 automjet zjarrfikës, 3 helikopterë dhe 2 avionë Air Tractor.
Vatrat aktive dhe angazhimi kryesor:
Mali i Dajtit, Tiranë – situata vijon të mbahet nën kontroll, megjithëse vatra mbetet aktive në të dyja anët e kreshtës. Sot operacioni për izolimin vijon me forcat operacionale, të mbështetura nga 50 efektivë të FA dhe 1 helikopter i Forcës Ajrore. Nuk ka rrezik për zonat e banuara.
Vakumone, Tiranë – situata është nën kontroll dhe vatra e izoluar, pa rrezik për zonat e banuara. Priska vijon në monitorim.
Gurë-Lurë, Dibër – vijon një nga operacionet më të mëdha, me 180 forca bashkiake, 14 policore, 30 efektivë të FA dhe 2 avionë Air Tractor. Korridoret e hapura kanë penguar avancimin e zjarrit drejt banesave. Sot vijon operacioni për izolimin e vatrës dhe nuk ka rrezik për zonat e banuara.
Qafë Helmës, Dibër/Bulqizë – zjarri është fikur nga krahu i Bulqizës dhe mbetet aktiv drejt Selishtës. Nuk ka rrezik për zonat e banuara.
Bruç, Mat – vijon operacioni në një terren shkëmbor dhe të vështirë, sot i përforcuar edhe me 30 efektivë të FA. Nuk ka rrezik për banesat.
Lufaj, Mirditë – vatra është aktive, por me intensitet të ulët dhe avancim të lehtë. Në operacion janë angazhuar MZSH, Policia, Shërbimi Pyjor, forcat bashkiake dhe banorët, të mbështetur nga 1 helikopter, 2 automjete zjarrfikëse të FA dhe 9 efektivë ushtarakë.
Fushë-Lajë, Pukë – vijon operacioni në terren të vështirë, ku era ka favorizuar përhapjen drejt pyjeve të Tërbunit dhe Gjegjanit. Sot janë angazhuar 3 automjete zjarrfikëse, 9 efektivë MZSH, 10 punonjës të Shërbimit Pyjor, 40 forca vendore, 15 vullnetarë, 30 efektivë të FA dhe 2 helikopterë. Nuk ka rrezik për zonat e banuara.
Në përgjithësi, situata vijon të menaxhohet me një angazhim të konsiderueshëm të kapaciteteve tokësore dhe ajrore, me prioritet izolimin e vatrave aktive dhe mbrojtjen e zonave të banuara. Në disa zona vatrat janë tashmë nën kontroll ose të izoluara, ndërsa nuk raportohet rrezik për banesat në vatrat kryesore aktive.
Agjencia Kombëtare e Mbrojtjes Civile vijon të ndjekë në mënyrë të pandërprerë situatën në të gjithë territorin e vendit, në koordinim të ngushtë me prefekturat, bashkitë dhe të gjitha strukturat e sistemit të Mbrojtjes Civile.
Kapacitetet operacionale mbeten të angazhuara në terren dhe në gatishmëri për të ndërhyrë aty ku situata e kërkon, me prioritet mbrojtjen e jetës, banesave dhe pasurisë së qytetarëve.
