Kapet me 3 armë zjarri në makinë 34-vjeçari në Maminas, dyshohet se do t’ua shiste grupeve kriminale. Në pranga edhe pasagjerja

Një 34-vjeçar është vënë në pranga në Maminas mbrëmjen e djeshme nga policia, pasi u kap me 3 armë zjarri në automjet, ku dyshohet se ka pasur për qëllim shitjen tek grupe kriminale në qytete të ndryshme të Shqipërisë.

Sipas raportimeve të policisë, në pranga ka rënë M. B., 34 vjeç, si dhe pasagjerja, shtetasja D. N., 39 vjeçe, për veprën penale “Moskallëzimi i krimit”.

Ndërkohë, u sekuestruan 3 armë zjarri, pistoleta, dhe 34 fishekë. Më tej, sipas raportimit të policisë gjatë kontrollit në banesën e 34-vjeçarit, u gjet 1 armë e ftohtë, dorezë hekuri.

Njoftimi i plotë i policisë:

Finalizohet operacioni i koduar “Hallkat”, kundër trafikimit të armëve të zjarrit, nga Kosova, me qëllim shitjen grupeve kriminale.

Sekuestrohen 3 pistoleta, dhjetëra fishekë luftarak, 1 automjet dhe 1 armë e ftohtë.

Arrestohet në Maminas, shtetasi që transportonte armët e zjarrit, me automjet.

Në pranga edhe pasagjerja, banuese në Kosovë, për moskallëzim të krimit.

Si rezultat i punës hetimore dhe operative, me qëllim parandalimin e ngjarjeve kriminale, nëpërmjet konstatimit dhe goditjes së rasteve të trafikimit të armëve të zjarrit, në Shqipëri, me qëllim shitjen grupeve kriminale në qytete të ndryshme, specialistët e Seksionit për Hetimin e Narkotikëve në bashkëpunim me Forcën e Posaçme Operacionale të DVP Durrës, finalizuan operacionin e koduar “Hallkat”.

Në kuadër të operacionit u arrestuan në flagrancë shtetasi M. B., 34 vjeç, banues në Kukës, për veprat penale “Trafikimi i armëve dhe i municionit” dhe “Prodhimi, mbajtja, blerja apo shitja pa leje e armëve të ftohta”, si dhe shtetasja D. N., 39 vjeçe, banuese në Prizren, për veprën penale “Moskallëzimi i krimit”.

Gjatë kontrollit në automjetin me të cilin ata lëviznin në Maminas, u gjetën 3 armë zjarri (pistoleta) dhe 34 fishekë, që dyshohet se janë trafikuar nga Kosova. Më tej, gjatë kontrollit në banesën e 33-vjeçarit, u gjet 1 armë e ftohtë (dorezë hekuri).

Hetimi vijon për të identifikuar dhe nxjerrë përpara përgjegjësisë penale, shtetas të tjerë që mund të jenë përfshirë në këtë rast.

Materialet procedurale iu referuan Prokurorisë, për veprime të mëtejshme.