Buxheti dhe Paketa Fiskale 2027, komisionet parlamentare shqyrtojnë shpenzimet publike, ndryshimet tatimore dhe TVSH-në ushqim
Komisionet e Kuvendit të Shqipërisë kanë nisur marrjen në shqyrtim të projektligjit “Për buxhetin e vitit 2027” dhe Paketës Fiskale që e shoqëron atë, përmes një sërë seancash dëgjimore me ministrat e linjës dhe përfaqësuesit e Financave.
Infrastruktura, Energjia dhe Mjedisi në Komisionin e Burimeve Natyrore
Nën drejtimin e kryetares Anila Denaj, Komisioni për Burimet Natyrore, Infrastrukturën dhe Zhvillimin e Qëndrueshëm zhvilloi dëgjesa me krerët e dy ministrive kyçe.
Ministria e Infrastrukturës dhe Energjisë
Ministri Enea Karakaçi prezantoi prioritetet buxhetore duke u ndalur te “projektet infrastrukturore, vijimi i investimeve në rrjetin rrugor, zhvillimi i sektorit energjetik dhe fondet e parashikuara për përmirësimin e shërbimeve dhe modernizimin e këtyre sektorëve”.
Ministria e Mjedisit
Ministri Sofjan Jaupaj paraqiti programet e parashikuara, ku në fokus ishin “politikat për mbrojtjen e mjedisit, menaxhimin e mbetjeve, ruajtjen e biodiversitetit dhe mbrojtjen e burimeve natyrore”, si dhe masat për përmbushjen e objektivave të zhvillimit të qëndrueshëm.
Paketa Fiskale 2027, ndryshimet në TVSH, Akcizë dhe Tatimin mbi të Ardhurat
Në Komisionin për Ekonominë, Punësimin dhe Financat, kryetarja Milva Ekonomi dhe ministri i Financave, Petrit Malaj, prezantuan linjat kryesore të Paketës Fiskale. Relatorët vlerësuan se ndryshimet synojnë “një rishpërndarje më të drejtë të barrës fiskale, duke mbajtur në vëmendje ekonomitë familjare, fuqinë blerëse dhe konkurrueshmërinë e biznesit”.
Ndryshimet kryesore ligjore përfshijnë Tatimi mbi Vlerën e Shtuar (TVSH). Relatorja Briseida Çakërri sqaroi se propozohet “aplikimi i një shkalle të reduktuar prej 6% për produktet ushqimore, ndryshimi në 10% i shkallës së reduktuar për turizmin, si dhe përcaktimi i shkallës standarde në masën 21%”.
Lidhur me Tatimi mbi të Ardhurat, relatori Adi Qose nënvizoi lehtësimin e barrës tatimore për kategorithë me aftësi të kufizuar dhe “rishikimin e normës së tatimit mbi të ardhurat nga dividendët nga 8% në 15%”. Sa i përket Akcizës, relatori Klevis Jahaj bëri me dije kalendarin e ri të akcizës së duhanit për periudhën 2027–2033, si dhe ndryshimin e njësisë matëse për biodiezelin nga lekë/kg në lekë/litër.
Lidhur me Procedurat Tatimore, relatori Elton Korreshi sqaroi se synohet “forcimi i kuadrit procedural dhe i masave administrative, në funksion të përmbushjes së detyrimeve tatimore”.
Deputetët e opozitës u shprehën kundër këtyre masave, me argumentin se politikat fiskale nuk u përgjigjen problematikave ekonomike dhe nuk krijojnë kushte për rritjen e investimeve.
Shpenzimet publike kalojnë 10 miliardë euro
Gjatë shqyrtimit në Komisionin për Bujqësinë, të drejtuar nga Blendi Klosi, zëvendësministri i Financave Endrit Yzeiraj bëri të ditur se për herë të parë shpenzimet publike do të tejkalojnë kufirin e 10 miliardë eurove. Sipas shifrave zyrtare të paraqitura nga Ministria e Financave të ardhurat totale parashikohen në 907,9 miliardë lekë (rreth 9,4 miliardë euro); deficiti buxhetor parashikohet në nivelin 2,3% e PBB-së; borxhi publik synohet të ulet në 52,4% të PBB-së dhe investimet publike mbi 2 miliardë euro do të alokohen për investime kapitale.
Qeveria nënvizoi se projektbuxheti i vitit 2027 mbështetet në tre shtylla kryesore: “mirëqenien sociale, stabilitetin fiskal dhe investimet e reformat në kuadër të integrimit në BE”.
Ndërkohë, Komisioni për Shëndetësinë dhe Mirëqenien Sociale, nën drejtimin e zv/kryetarit Eduart Shalsi, miratoi kalendarin e punës për procedimin e mëtejshëm të projektligjit të buxhetit.
