Stuhi dhe erëra të forta lënë mijëra pa energji elektrike në Michigan

MICHIGAN — Stuhi të forta të shoqëruara me erëra të fuqishme kanë lënë mijëra banorë të shtetit të Michigan pa energji elektrike gjatë pasdites së së hënës, 27 prill.

Sipas të dhënave nga PowerOutage.us, më shumë se 73,000 konsumatorë ishin pa energji elektrike rreth orës 5:50 pasdite. Zonat më të prekura deri tani janë qarqet Kalamazoo County dhe Calhoun County, ku mbi 32,000 abonentë kanë humbur furnizimin me energji.

Kompania Consumers Energy kishte vendosur në gatishmëri më shumë se 300 ekipe pune që në orët e para të ditës, në pritje të përkeqësimit të motit. Autoritetet paralajmëruan për erëra që mund të arrijnë mbi 60 milje në orë gjatë mbrëmjes dhe natës.

Sipas raportimeve, kushtet atmosferike kanë sjellë erëra të qëndrueshme prej 45–55 milje në orë, me raste të izoluara që kanë arritur nivele më të rrezikshme. Në zonat pranë Lake Michigan është raportuar një rafal ere që ka kaluar mbi 70 milje në orë.

Pasojat e stuhisë janë ndjerë në disa komunitete. Në Kalamazoo, një person u dërgua në spital pasi një pemë e rrëzuar shkaktoi shembjen e çatisë së një banese. Katër persona të tjerë mbetën të bllokuar brenda shtëpisë gjatë incidentit.

Raporte të shumta tregojnë për pemë të rrëzuara dhe linja energjie të dëmtuara në të gjithë shtetin. Në Calhoun County është raportuar gjithashtu, ende pa konfirmim zyrtar, një rast ku një pemë ka rënë mbi një shtëpi, megjithëse deri tani nuk ka njoftime për të lënduar.

Autoritetet dhe kompanitë energjetike vijojnë punën për rikthimin e energjisë, ndërsa kushtet e motit mbeten të paqëndrueshme në disa zona të Michiganit.