Mjaft me doreza të fshehura të dyerve në automjete, Kina tërheq 3 milionë makina Tesla

Nëse dorezat minimaliste të tërheqshme të dyerve të automjeteve elektrike konsideroheshin si një nga emblemat e dizajnit të lëvizshmërisë elektrike, tani ato janë në qendër të tërheqjes më masive të makinave, prej më shumë se 4 milionësh, në Kinë.

Tërheqja, e cila përfshin 2.98 milionë Tesla të prodhuara në Kinë, vjen mes shqetësimeve në rritje për sigurinë, pasi në situata emergjente kur çdo sekondë ka rëndësi, dorezat e fshehura të dyerve janë të vështira për t’u gjetur dhe hapur.

Prodhuesit kinezë të makinave XPeng, Xiaomi dhe Geely po tërheqin gjithashtu automjete.

Dorezat e fshehura të dyerve, të bëra të njohura nga Tesla e multimiliarderit Elon Musk, shfaqen vetëm kur pronari i afrohet automjetit të tij.

Megjithatë, ky dizajn inovativ u kritikua dhe u shqyrtua me kujdes pas dy aksidenteve fatale në Kinë që përfshinin automjete elektrike Xiaomi, ku besohet se një ndërprerje e energjisë ka penguar hapjen e dorezave.

Tesla njoftoi në një deklaratë të premten se po tërheq nga tregu disa automjete Model 3, Y, S dhe X për shkak të dorezave të dyerve që janë “të vështira për t’u gjetur dhe përdorur, pasi ngjyra e tyre është e ngjashme me atë të zbukurimeve të brendshme”.

Kjo mund t’i pengojë pasagjerët ose ekipet e shpëtimit të hapin shpejt dyert në rast urgjence, si p.sh. gjatë një “përplasjeje të rëndë që shkakton dëmtime në sistemin e tensionit të ulët të automjetit”.

Tesla tha se do të vendosë etiketa paralajmëruese në automjetet e tërhequra dhe do të lëshojë një përditësim të softuerit që do të ulë automatikisht dritaret e automjetit pas një përplasjeje.

Në shkurt, autoritetet kineze njoftuan ndalimin e dorezave të fshehura të dyerve.

Sipas rregullave të reja që do të hyjnë në fuqi më 1 janar 2027, makinat do të lejohen të shiten në Kinë vetëm nëse kanë një dorezë mekanike si në pjesën e brendshme ashtu edhe në atë të jashtme të dyerve të tyre.