Plagoset me thikë një person pranë shkollës “Petro Nini Luarasi” në Tiranë, arrestohet autori
Një ngjarje e rëndë është raportuar mbrëmjen e kësaj të mërkure në kryeqytet, ku një 49-vjeçar me inicialet K.C. ka mbetur i plagosur me thikë në afërsi të shkollës së mesme të përgjithshme “Petro Nini Luarasi” në Tiranë.
K.C. është goditur disa herë në zonën e barkut dhe ndodhet në gjendje të rëndë shëndetësore. Ai është transportuar në spital, ku ndodhet në operacion.
Nuk dihen ende rrethanat e plota të ngjarjes ndërkohë, autori i dyshuar i plagosjes, shtetasi T. N., 50 vjeç është arrestuar nga Policia e Tiranës.
Njoftimi i policisë
“Shërbimet e Policisë, menjëherë pas marrjes së njoftimit se në rrugën “Marko Boçari” ishte dëmtuar me mjet prerës shtetasi K. C., 49 vjeç, shkuan në vendngjarje për të sqaruar autorësinë dhe rrethanat e rastit. Si rezultat i reagimit të menjëhershëm dhe veprimeve të shpejta hetimore e operacionale, u identifikua, u kap dhe u vu në pranga autori i dyshuar, shtetasi T. N., 50 vjeç. Nga veprimet e deritanishme hetimore dyshohet se 50-vjeçari ka plagosur me mjet prerës 49-vjeçarin, pas një konflikti për motive të dobëta. I dëmtuari ndodhet në spital, nën kujdesin e mjekëve ndërsa materialet procedurale iu referuan Prokurorisë, për veprime të mëtejshme”, njofton policia.
