Trump njofton fabrikën më të madhe të çelikut në historinë e SHBA-së në Iowa: investim 15 miliardë dollarë
Presidenti Donald Trump njoftoi të hënën një investim prej 15 miliardë dollarësh për ndërtimin e fabrikës më të madhe të çelikut në historinë e Shteteve të Bashkuara në Iowan lindore — një projekt që, sipas Shtëpisë së Bardhë, do të sjellë mijëra vende pune.
Njoftimi u bë nga Zyra Ovale, ku presidenti u shoqërua nga drejtuesit e kompanisë Mesabi Metallics dhe nga zyrtarë të lartë federalë e shtetërorë, siç njofton Wall Street Journal. Kompania, me bazë në Minesota dhe pjesë e konglomeratit indian Essar Group, planifikon të ndërtojë një fabrikë me kapacitet fillestar rreth 7.5 milionë tonë çeliku në vit — shifër që do ta bënte atë prodhuesen më të madhe në vend.
Sipas Shtëpisë së Bardhë, ndërtimi pritet të fillojë këtë muaj, ndërsa prodhimi do të nisë në vitin 2030. Projekti parashikohet të krijojë rreth 6,000 vende pune në ndërtim dhe rreth 1,750 vende pune të përhershme në operimin e fabrikës.
Në ceremoninë e njoftimit ishin të pranishme guvernatorja e Iowas, Kim Reynolds, dhe sekretari i Tregtisë, Howard Lutnick, i cili ia atribuoi projektin tarifave të vendosura për çelikun: „Pa ato tarifa, kjo minierë nuk ndërtohej dhe kjo fabrikë nuk ndërtohej“, deklaroi ai, ndërsa presidenti Trump u pajtua me këtë vlerësim.
Njoftimi vjen rreth pesë javë para zgjedhjeve të mesmandatit, në një shtet si Iowa ku priten gara të ngushta elektorale, duke i dhënë projektit edhe një dimension të qartë politik.
Lajmi megjithatë nuk u prit mirë nga tregu: aksionet e prodhuesve të mëdhenj amerikanë të çelikut — Nucor, Steel Dynamics dhe Cleveland-Cliffs — ranë pas njoftimit, ndërsa investitorët shprehën frikë se kapaciteti i ri mund të çojë në mbiprodhim.
