Në futboll, rëndësia e një lojtari nuk matet gjithmonë me numrin e minutave që qëndron në fushë. Ka futbollistë që, edhe kur nuk e nisin ndeshjen si titullar, dinë të tregojnë se përse vazhdojnë të jenë pjesë e rëndësishme e një ekipi. E pikërisht një prej tyre është Milot Rashica.

Ky grumbullim i Kombëtares së Kosovës ishte një tjetër dëshmi për vlerat që Rashica mund t’i sjellë ekipit kombëtar. Edhe pse ndeshjet ndaj Irlandës, Izraelit dhe Austrisë nuk i nisi si titullar, në momentet kur u aktivizua tregoi përkushtim, karakter dhe cilësi.

Rashica hyri në fushë me energjinë dhe seriozitetin që e kanë karakterizuar gjatë gjithë rrugëtimit të tij me fanellën e dardane. Nuk pati nevojë për shumë minuta për të treguar se përvoja e tij mund të jetë e rëndësishme në çdo moment të një ndeshjeje. Lëvizjet e tij, shpejtësia, aftësia për ta mbajtur topin dhe për të krijuar hapësira e bëjnë atë një futbollist që mund të ndryshojë ritmin e lojës.

Por, përtej cilësive teknike, ajo që bie në sy te Rashica është qasja ndaj fanellës së Kosovës.

Ai është pjesë e një gjenerate që ka kaluar shumë momente të rëndësishme të futbollit kosovar. Ka qenë në fushë në ndeshje historike, ka përjetuar fitore e humbje, presion e emocione dhe e njeh më mirë se shumë të tjerë peshën që ka fanella e Dardanëve.

Pikërisht kjo përvojë është një vlerë që nuk matet me statistika. Në një ekip që vazhdimisht po ndërton dhe po konsolidohet, lojtarë si Rashica kanë një rol të veçantë. Ata nuk janë vetëm futbollistë që mund të japin kontribut në fushë, por edhe figura që e njohin rrugëtimin e Kombëtares dhe mund t’ua përcjellin brezave të rinj përvojën e fituar ndër vite.

Paraqitja e mbrëmshme ndaj Austrisë ishte një tjetër moment ku Rashica e dëshmoi këtë. Kosova zhvilloi një ndeshje shumë të mirë për pjesën më të madhe të takimit, duke krijuar raste dhe duke e vënë në vështirësi një kundërshtar që ishte pjesë e Kupës së Botës 2026. Rashica ishte pjesë e kësaj performance dhe, në minutat e tij, dha atë që pritej prej tij.

Fatkeqësisht, mbrëmja për të nuk përfundoi ashtu siç do të dëshironte.

Para se të lëndohej ishte shumë afër goli, por atë ia mohoi shtylla.

Tani tifozët e dardanë shpresojnë që Rashica të rikthehet sa më shpejt në fushë sepse Kosova ka nevojë për të. Ka nevojë për shpejtësinë e tij, përvojën e tij, personalitetin e tij dhe për atë aftësi për të marrë përgjegjësi në momentet kur ekipi ka nevojë për të.

Ndeshjet e nëntorit janë afër dhe shpresa është që Rashica të jetë sërish në dispozicion të përzgjedhësit Franco Foda. Nëse rikuperimi shkon mirë, prania e tij do t’i japë Kosovës një alternativë më shumë dhe, mbi të gjitha, një futbollist me përvojë që e njeh shumë mirë ambientin e Kombëtares.