Burri nga Chesterfield Township akuzohet se kërcënoi me vdekje drejtorin e FBI-së Kash Patel dhe një bashkëpunëtor të tij

Një burrë 42-vjeçar nga Chesterfield Township, në qarkun Macomb, u arrestua sot, më 30 tetor, dhe u akuzua për kërcënime me vdekje ndaj drejtorit të FBI-së, Kash Patel, dhe ndaj një bashkëpunëtori të tij, njoftoi Departamenti amerikan i Drejtësisë në komunikatën e Zyrës së Prokurorit të SHBA për Distriktin Lindor të Michiganit.

Sipas komunikatës së nënshkruar nga prokurori federal Jerome F. Gorgon Jr., i pandehuri është Anthony Daniel Palazzolo. Aktakuza penale thotë se më 8 tetor 2026 Palazzolo i dërgoi bashkëpunëtorit të drejtorit — i identifikuar në dokumente vetëm si Viktima-1 — një mesazh në Facebook, ku shkruante se kishte «vënë një shpërblim» (hit) për kokën e tij dhe se edhe Patel ishte «një i vdekur».

Sipas Departamentit të Drejtësisë, kërcënimet nuk u ndalën pas ndërhyrjes së hetuesve: pas intervistës që FBI-ja i bëri, Palazzolo vijoi të ngacmonte me telefon një agjent të FBI-së në Detroit, duke kërcënuar se do të shkonte në zyrë dhe do të përdorte «forcë vdekjeprurëse kundër secilit prej jush, zyrtarë qeveritarë — FBI dhe Shërbimi Sekret do të vriten të gjithë».

Palazzolo u paraqit sot pasdite në gjykatën federale dhe u la përkohësisht në paraburgim, njofton Departamenti i Drejtësisë. Seanca për paraburgimin është caktuar për më 2 nëntor.

Njoftimi u bë bashkërisht nga prokurori Gorgon dhe nga Jennifer Runyan, agjentja speciale përgjegjëse e FBI-së në Detroit. Çështja po hetohet nga FBI-ja dhe po ndiqet penalisht nga ndihmësprokurori federal Eaton Brown.

Departamenti i Drejtësisë thekson se aktakuza penale është vetëm një dokument akuze dhe jo provë faji: i pandehuri ka të drejtën e një gjyqi të drejtë, ku do t’i takojë qeverisë të provojë fajësinë përtej çdo dyshimi të arsyeshëm.