“Pulat turbo”, Danimarka kërkon ndalim në të gjithë BE-në

– Danimarka po kërkon ndalimin e pulave që rriten me ritme të përshpejtuara, të njohura si “pulat turbo”, si në vend, ashtu edhe në të gjithë Bashkimin Evropian, pas publikimit të pamjeve që kanë ngritur shqetësime për trajtimin e kafshëve në fermat e shpendëve.

Sipas gazetës britanike “The Guardian”, debati u intensifikua pas transmetimit të një dokumentari nga televizioni danez TV2, i cili publikoi pamje të filmuara në mënyrë të fshehtë në një fermë në veri të Danimarkës. Sipas dokumentarit, prodhuesi Christian Tvergaard kishte shkelur rregullat për periudhën e errësirës që duhet t’u sigurohet pulave, duke e kufizuar atë për të nxitur ushqyerjen dhe rritjen e tyre.

Tvergaard pranoi se kishte marrë vendime të gabuara dhe deklaroi se kishte ndërmarrë ndryshime në programin e ndriçimit dhe në procedurat e punës në fermë.

Në qendër të debatit është raca Ross 308, e përhapur gjerësisht në prodhimin industrial të mishit të pulës. Këta shpendë mund të arrijnë peshën prej rreth dy kilogramësh brenda vetëm 33 ditësh, ndërsa racave me rritje më të ngadaltë u nevojiten nga 46 deri në 63 ditë për të arritur të njëjtën peshë.

Rritja e shpejtë lidhet me shqetësime për mirëqenien e kafshëve, pasi mund të shkaktojë probleme me zhvillimin e kockave, organeve dhe lëvizshmërinë.

Ministri danez për Natyrën dhe Mirëqenien e Kafshëve, Christian Rabjerg Madsen, deklaroi se qeveria do të punojë për një ndalim kombëtar dhe do të kërkojë mbështetjen e vendeve të BE-së për një masë të ngjashme në nivel evropian. Propozimi kërkon ende shqyrtim ligjor dhe ekonomik.

Nisma ka marrë mbështetje nga përfaqësues të forcave të ndryshme politike në Danimarkë. Megjithatë, industria e shpendëve paralajmëron se një ndalim që prek vetëm prodhimin vendas mund të rrisë importet nga vende ku përdoren të njëjtat raca, pa sjellë përmirësime të ndjeshme për mirëqenien e kafshëve.

Organizatat për mbrojtjen e kafshëve kërkojnë që BE-ja të nxisë përdorimin e racave me rritje më të ngadaltë. Disa prej tyre propozojnë që pulat të rriten për rreth 56 ditë përpara se të arrijnë peshën e tregut.

Debati për kushtet e rritjes së kafshëve po zë një vend gjithnjë e më të rëndësishëm në politikat bujqësore evropiane, duke vënë përballë kostot e prodhimit industrial dhe kërkesat për standarde më të larta të mirëqenies së kafshëve.