Papa viziton të burgosurit në argjentinë, përcjell mesazhin e shpresës për një fillim të ri
Buenos Aires, 11 nëntor, ATSH/ – Papa Leo XIV zhvilloi një vizitë në burgun federal të Villa Devoto në Buenos Aires, ku u takua me të burgosurit dhe përcolli një mesazh shprese, faljeje dhe mundësie për një fillim të ri.
Gjatë takimit, Papa përshëndeti dhe përqafoi disa prej të burgosurve, duke u afruar personalisht me ta. Vizita u shoqërua me dëshmi të të burgosurve, të cilët ndanë me të përvojat dhe vështirësitë e jetës së tyre.
“Shpresoj që të gjithë ne, edhe unë vetë, ta mbajmë në zemër këtë mesazh: një jetë e re është e mundur. Kjo është shpresa për të cilën kemi nevojë”, u shpreh Papa Leo XIV.
Ai theksoi se burgu, pavarësisht privimeve dhe vuajtjeve që sjell, mund të bëhet një hapësirë për ndryshim, rritje personale dhe pajtim me familjen dhe shoqërinë.
Papa foli gjithashtu për dhimbjen e ndarjes nga njerëzit e dashur, duke u shprehur se e kupton zhgënjimin e atyre që nuk kanë gjetur një dorë të shtrirë për t’i ndihmuar të ringrihen.
“Koha e kaluar në këtë institucion mund të jetë një mundësi për të filluar nga e para, për t’u pajtuar me Zotin dhe për t’u rikthyer pa frikë në përqafimin e familjeve dhe shoqërisë”, tha ai.
Burgu i Villa Devoto ka një histori të rëndë, pasi gjatë diktaturës ushtarake në Argjentinë, në vitet 1976-1983, shërbeu edhe si vend ndalimi dhe torture për të burgosurit politikë. Në vitin 1978, 65 të burgosur humbën jetën gjatë ngjarjes së njohur si masakra e Pavijonit Shtatë.
Vizita në burg ishte një nga ndalesat e fundit të Papës në Argjentinë, gjatë udhëtimit të tij apostolik në Amerikën e Jugut, përpara se të vijonte drejt Perusë.
