KFOR-i dhuron pajisje kirurgjikale dhe materiale mjekësore për Onkologjinë Pediatrike në QKUK

Misioni i NATO-s në Kosovë, KFOR, i ka dhuruar pajisje kirurgjikale me precizion të lartë dhe materiale mjekësore Repartit të Onkologjisë Pediatrike në Qendrën Klinike Universitare të Kosovës (QKUK), në Prishtinë, siç njofton KosovaPress. Dhurimi synon të përmirësojë kapacitetet e trajtimit të fëmijëve me kancer dhe të mbështesë stafin mjekësor të repartit.

Gjatë vizitës në repart, komandanti i Njësisë Multinacionale të Specializuar (MSU), koloneli Gianfranco Di Fiore, i shoqëruar nga karabinierët e ekipit CIMIC, u takua me stafin mjekësor dhe u njoh nga afër me punën dhe nevojat e repartit.

Përveç pajisjeve dhe materialeve mjekësore, për pacientët e vegjël u dhuruan edhe lodra, me qëllim që ambienti i trajtimit të jetë më mikpritës dhe më i qetë për fëmijët dhe familjet e tyre gjatë qëndrimit në spital.

Nga KFOR-i u theksua se angazhimi i misionit shkon përtej sigurisë, me mbështetje konkrete për komunitetet dhe institucionet vendore, veçanërisht për institucionet shëndetësore, fëmijët dhe familjet. Vlera monetare e dhurimit nuk është bërë e ditur.