Dardanët nisin përgatitjet për Irlandën, Foda kishte në dispozicion 13 futbollistë

Kombëtarja e Kosovës ka nisur përgatitjet për ndeshjen e fundit të këtij edicioni në Ligën e Kombeve, ku të martën do të përballet me Irlandën në Dublin, siç njofton Telegrafi.

Dardanët vijnë në këtë sfidë pas barazimit të djeshëm ndaj Izraelit, ndërsa dueli me irlandezët do të jetë vendimtar për pozitën e dytë në grup.

Në stërvitjen e zhvilluar në stadiumin “Fadil Vokrri”, përzgjedhësi Franco Foda kishte në dispozicion 13 futbollistë. Ndërkohë, lojtarët që ishin titullarë në ndeshjen ndaj Izraelit zhvilluan një seancë rigjeneruese në palestrën e hotelit.

Pasditen e sotme, Kombëtarja e Kosovës do të udhëtojë drejt Dublinit, ku do të vazhdojë përgatitjet për përballjen e rëndësishme të së martës.

Kosovës i duhet një paraqitje e mirë në udhëtim për të synuar pozitën e dytë në grup dhe për ta mbyllur këtë edicion të Ligës së Kombeve në mënyrën më të mirë të mundshme.