Nga sot pajisjet dimërore të detyrueshme në Kosovë, gjobë 40 euro për shoferët pa to

Siç njofton KosovaPress, nga sot, 15 nëntor, në Kosovë ka nisur periudha e obligimit për pajisje dimërore për automjetet, pavarësisht kushteve të motit. Shoferët duhet të kenë pajisjet e kërkuara dimërore, edhe kur moti nuk duket dimëror.

Sipas KosovaPress, obligimi, i parashikuar në Ligjin për Rregullat e Trafikut Rrugor, mbetet në fuqi deri më 15 mars të vitit të ardhshëm.

Shoferët që nuk e respektojnë obligimin rrezikojnë gjobë prej 40 eurosh, ndërsa për personat juridikë dhe institucionet publike, në rastet e përcaktuara me ligj, gjoba është 60 euro. Po ashtu, në rrugët e mbuluara me borë ose akull, automjetet pa pajisjet e kërkuara dimërore mund të ndalohen nga qarkullimi.

Sot shumë shoferë iu drejtuan vullkanizerëve për ndërrimin e gomave, ndërsa pronarët e vullkanizerëve thanë se interesimi ka qenë i madh. Qytetari Agim Maloku nga Obiliqi tha se ndërrimi i gomave është shumë i rëndësishëm, jo vetëm si obligim nga 15 nëntori, por edhe si siguri për jetën e njerëzve, pasi në dimër në zonën e Obiliqit krijohen ngrica në asfalt.