Pagat e magjistratëve, Prokuroria e Beratit shpall moskompetencën dhe ia kalon çështjen SPAK-ut
Prokuroria pranë Gjykatës së Shkallës së Parë të Juridiksionit të Përgjithshëm në Berat ka shpallur moskompetencën lëndore për kallëzimet lidhur me ndryshimet në ligjin për statusin e gjyqtarëve dhe prokurorëve dhe ka vendosur t’ia kalojë çështjen Prokurorisë së Posaçme kundër Krimit të Organizuar dhe Korrupsionit (SPAK), siç njofton BalkanWeb.
Hetimet për procedimin penal nr. 440 të vitit 2026 nisën pas ankesës së shtetases N.Xh., specialiste e protokollit pranë Gjykatës së Beratit, e cila denoncoi pamundësinë për të tërhequr pagën për shkak të kontradiktave lidhur me formulën e përllogaritjes së pagave të gjyqtarëve. Punonjësja denoncoi drejtuesen e thesarit në Berat, A.R., me pretendimin se i ka shkaktuar dëm ekonomik dhe financiar.
Të pyetur nga hetuesit, punonjësit e gjykatës pohuan problemet me kalimin e pagave për muajin gusht 2026. Shefja e sektorit të buxhetit dhe menaxhimit financiar, M.Sh., pranoi se punonjësit e gjykatës nuk e morën në kohë pagën e gushtit: përllogaritja ishte bërë sipas vendimit nr. 435, datë 26.08.2026, të Këshillit të Lartë Gjyqësor, në zbatim të vendimit nr. 15 të vitit 2026 të Gjykatës Kushtetuese dhe formulës së përcaktuar në vendimin nr. 35/2022, por lista e pagesave nuk u miratua nga Dega e Thesarit.
Sipas BalkanWeb, drejtuesja e thesarit i kishte sqaruar gjykatës me email se listëpagesat e gushtit duhej të dërgoheshin me nivelin e pagave të korrikut 2026, që ekzekutimi të bëhej i mundur, ndërsa ndarja e listëpagesave veç për gjyqtarët dhe veç për administratën binte ndesh me udhëzimet në fuqi. Pas këtij vlerësimi, Prokuroria e Beratit konstatoi se kompetenca i takon SPAK-ut dhe shpalli moskompetencën.