Shqipëria mes përfitueseve të para të play-off-it për Euro 2028
Shqipëria mund të ketë një tjetër rrugë drejt fazës finale të Euro 2028, përmes Ligës së Kombeve, raporton Top Channel. Sipas një analize të publikuar më 17 nëntor, kuqezinjtë renditen aktualisht të dytët në radhën e përfaqësueseve që mund të përfitojnë një biletë për fazën play-off të Europianit.
Renditja merr në konsideratë skuadrat që nuk pritet të përfundojnë në dy vendet e para të grupeve kualifikuese dhe që nuk do të sigurojnë një vend si organizatore të turneut. Listën e kryeson Mali i Zi, i ndjekur nga Shqipëria, Islanda dhe Sllovakia, të cilat sipas projeksionit aktual do të përfitonin vendet e para të lira.
Në pritje të mundësive të tjera janë Malta, Çekia, Ukraina dhe Polonia, të cilat mund të përfitojnë nëse hapen më shumë vende në varësi të rezultateve të eliminatoreve. Polonia, e 33-ta në renditjen përkatëse, si skuadra me renditjen më të ulët mes vendeve të treta të Ligës B, konsiderohet kufiri i fundit për një biletë pa fituar grupin në Ligën e Kombeve.
Sipas projeksionit, mundësia që të hapen të paktën pesë vende përmes Ligës së Kombeve vlerësohet në 59 për qind. Për gjashtë vende probabiliteti është 32 për qind, për tetë vende 27 për qind, ndërsa mundësia për nëntë bileta vlerësohet vetëm 7 për qind. Një numër i tillë mund të arrihej nëse një vend organizator përfundon mes katër skuadrave me renditjen më të ulët në grupin e vendeve të dyta të eliminatoreve dhe përfiton një vend të rezervuar.
Për Shqipërinë, kjo do të thotë se suksesi në Ligën e Kombeve mund të vlejë edhe përtej triumfit në grup. Kuqezinjtë janë në një pozicion të favorshëm në këtë renditje, por gjithçka do të varet nga rezultatet e eliminatoreve të Euro 2028 dhe nga skuadrat që do të kualifikohen direkt.