Mike Rogers dorëzon firmat për të hyrë në garën republikane për Senatin amerikan në Michigan
Ish-kongresmeni republikan Mike Rogers ka dorëzuar mijëra firma për të siguruar një vend në fletën e votimit për zgjedhjet paraprake të gushtit për Senatin e SHBA-së në shtetin e Michiganit.
Rogers foli para mbështetësve në Lansing, duke theksuar se gara në Michigan nuk po ndjek modelin tipik të zgjedhjeve të mesmandatit. Sipas tij, në shtet ekziston një energji politike më e fortë se zakonisht, që mund të ndikojë ndjeshëm në rezultatin e zgjedhjeve.
“Për herë të parë në 32 vite, do ta rikthejmë këtë vend në Senat për njerëzit e Michiganit dhe familjet punëtore,” deklaroi ai gjatë aktivitetit.
Fushata e tij dorëzoi firmat në zyrën e Sekretarit të Shtetit për të siguruar zyrtarisht pjesëmarrjen në primaret republikane të gushtit.
Mike Rogers ka një përvojë të gjatë politike, duke shërbyer për shtatë mandate në Kongresin amerikan nga viti 2001 deri në vitin 2015. Ai kandidoi edhe në zgjedhjet për Senatin në vitin 2024, ku humbi ngushtë përballë kandidates demokrate Elissa Slotkin.
Në këtë cikël zgjedhor, Rogers synon të zëvendësojë senatorin aktual demokrat Gary Peters, i cili ka njoftuar se nuk do të kandidojë për një mandat tjetër.
Duke komentuar shanset e tij këtë herë, Rogers minimizoi parashikimet se republikanët mund të përballen me vështirësi në zgjedhjet e mesmandatit, pjesërisht për shkak të ndikimit të presidentit Donald Trump. Ai theksoi se fakti që në Michigan do të ketë gara të hapura si për guvernatorin, ashtu edhe për Senatin, e bën situatën më të paparashikueshme.
Nëse fiton nominimin republikan në gusht – ku aktualisht përballet me kundërshtarë me profil më të ulët publik – Rogers do të përballet në nëntor me kandidatin që do të dalë nga një garë e fortë në kampin demokrat.
Sondazhet e fundit tregojnë një garë të ngushtë mes disa kandidatëve demokratë, përfshirë kongresisten Haley Stevens, senatoren shtetërore Mallory McMorrow dhe ekspertin e shëndetit publik Dr. Abdul El-Sayed.
Zgjedhjet për Senatin në Michigan pritet të jenë ndër më të rëndësishmet në nivel kombëtar, pasi mund të ndikojnë në balancën e forcave në Senatin e Shteteve të Bashkuara.
