Të shtëna me armë në një festival në SHBA, 12 persona të plagosur! Autorët në arrati
Të paktën dymbëdhjetë persona u plagosën të shtunën në qytetin e Toledos, në shtetin amerikan të Ohajos në verilindje, në margjinat e një festivali lokal, tha policia, e cila deri më tani nuk ka arrestuar asnjë të dyshuar.
“Dymbëdhjetë persona u plagosën nga të shtënat me armë zjarri, dy prej të cilëve janë në gjendje të rëndë”, u tha gazetarëve zëvendësshefi i policisë së Toledos, Joseph Heffernan, duke shtuar se deri më tani nuk është arrestuar asnjë i dyshuar.
Sipas raporteve fillestare, të paktën dy persona hapën zjarr, tha ai.
“Ndoshta kanë qëlluar drejt njëri-tjetrit”, vlerësoi ai.
Ngjarja u regjistrua pranë qytetit të vjetër, ku po zhvillohet Festivali dy-ditor i Old West End, i cili u ofron vizitorëve koncerte, tregje, ekspozita dhe ngjarje çdo vit, sipas faqes së tij të internetit.
Autoritetet po marrin deklarata nga dëshmitarë okularë dhe po shqyrtojnë videot e filmuara me celularë nga kalimtarët. Ata i bënë thirrje publikut të paraqesë çdo informacion që mund t’i ndihmojë ata të kapin të dyshuarit.
Sipas Dan Gerken, një oficer policie, shumica e viktimave ishin në të 20-at.
Shtetet e Bashkuara kanë më shumë armë sesa njerëz, dhe qasja në to ose blerja e tyre është përgjithësisht e lehtë. Vendi numëron mijëra vdekje çdo vit nga dhuna me armë, më shumë se çdo vend tjetër i zhvilluar ekonomikisht, pa llogaritur vetëvrasjet.
