SHBA po shqyrton planin që të blejë Ishujt Chagos nga Mauritiusi

Shtetet e Bashkuara të Amerikës po shqyrtojnë një plan për të blerë Ishujt Chagos nga Mauritiusi, nëse Britania e Madhe ia lëshon sovranitetin Mauritiusit mbi ishujt, ku ndodhet baza ushtarake strategjikisht e rëndësishme britaniko-amerikane “Diego Garcia”, tha sot një zyrtar amerikan i njohur me bisedimet.

Një zyrtar amerikan i tha gazetës britanike Telegraph se Shtëpia e Bardhë kishte diskutime të rregullta me Downing Street në lidhje me të ardhmen e bazës Diego Garcia.

Blerja e ishujve është një nga disa opsione të hartuara nga administrata e Presidentit të SHBA-së, Donald Trump, në një dokument që synon të ofrojë alternativa ndaj planit të kryeministrit britanik Keir Starmer për t’ia dorëzuar sovranitetin mbi ishujt Mauritiusit.

Në prill, qeveria britanike pezulloi marrëveshjen për transferimin e sovranitetit mbi Ishujt Chagos te Mauritiusi, ku ndodhet baza ajrore amerikano-britanike Diego Garcia.

Trump tha në shkurt se marrëveshja për transferimin e sovranitetit mbi Ishujt Chagos te Mauritiusi ishte një “gabim i madh”.