Nis ndërtimi i “Founders House” në Detroit, projekt rezidencial për Universitetin e Michiganit
Godinë 13-katëshe me 313 njësi do të shërbejë për studentë dhe staf akademik pranë kampusit të ri UMCI
Ka nisur zyrtarisht ndërtimi i një godine të re rezidenciale me 313 njësi banimi në qendër të Detroitit, e quajtur “Founders House”, e cila do të ndërtohet pranë Qendrës për Inovacion të Universitetit të Michiganit (UMCI).
Ceremonia e hapjes së punimeve u zhvillua në mesditë, duke shënuar fillimin e një prej projekteve kryesore që janë pjesë e një plani investimesh mbi 615 milionë dollarë, i njohur si “Transformational Brownfield Plan”. Ky projekt realizohet në bashkëpunim mes kompanisë së zhvillimit të pasurive të paluajtshme Olympia Development of Michigan, në pronësi të familjes Ilitch, dhe kompanisë së njohur nga Nju Jorku, Related, e themeluar nga biznesmeni me origjinë nga Detroiti, Stephen Ross.
Godina e re do të ndërtohet në adresën 2205 Cass Avenue dhe do të ketë 13 kate. Ajo do të jepet me qira për Universitetin e Michiganit, duke shërbyer si hapësirë banimi për studentët dhe stafin akademik që do të jenë pjesë e kampusit të ri të inovacionit në qytet.
Vetë Universiteti i Michiganit nisi ndërtimin e kampusit të tij satelit për studime pasuniversitare në dhjetor të vitit 2023. Ky kampus, me vlerë rreth 250 milionë dollarë dhe me gjashtë kate, pritet të përfundojë në verën e vitit 2027. Ndërkohë, ndërtesa rezidenciale “Founders House” synohet të përfundojë në vitin 2028.
Fillimisht, projekti ishte parashikuar të ishte më i lartë, me 18 kate dhe 261 njësi banimi, ku 54 prej tyre do të ishin të destinuara si banesa të përballueshme për familjet me të ardhura të ulëta. Megjithatë, ky plan u ndryshua vitin e kaluar pasi Universiteti i Michiganit vendosi të marrë me qira të gjithë godinën për një periudhë 40-vjeçare, duke e orientuar projektin tërësisht drejt nevojave të komunitetit universitar.
