Rama për ZDF: Shqipëria nuk mund t’i thotë ”jo” një projekti prej katër miliardë eurosh

– Projekti në Zvërnec është një investim prej katër miliardë eurosh, të cilit Shqipëria nuk mund t’i thotë jo, tha kryeministri Rama për median e njohur gjermane ZDF.

Sipas ZDF Heute, prej më shumë se një muaji, çdo mbrëmje zhvillohen protesta në kryeqytetin shqiptar, Tiranë. Ato u nxitën nga projekti për ndërtimin e një resorti luksoz në Lagunën e Zvërnecit dhe në ishullin e Sazanit. Mes investitorëve është edhe kompania e investimeve e dhëndrit të Donald Trump, Jared Kushner.

Ambientalistët druhen se projekti do të shkaktojë dëme të rënda në një strehë unike shpendësh dhe zonë të mbrojtur ligatinore.

Ndërkohë, protestat janë zgjeruar përtej projektit të ndërtimit dhe tashmë përfshijnë akuza për korrupsion, mungesë transparence dhe kritika ndaj kryeministrit aktual, Edi Rama.

Ish-artisti, ish-kryetari i Bashkisë së Tiranës dhe ish-lojtari i kombëtares së basketbollit i hedh poshtë këto akuza.

Në intervistë, Rama flet për protestat, konfliktin mes politikës, mbrojtjes së natyrës dhe investimeve, si edhe për rrugën e Shqipërisë drejt Bashkimit Evropian.

ZDFheute: Zoti kryeministër, do të donim të kuptonim strukturën dhe planet e investitorëve që po planifikojnë një resort turistik në Zvërnec, pranë lagunës. Deri tani nuk është plotësisht e qartë se kush janë investitorët dhe cili është roli i shtetit. A mund të na e sqaroni?

Rama: Nuk e di çfarë informacioni keni ju, por ka disa përgjigje të thjeshta. Së pari, bëhet fjalë për pronë private. Së dyti, prona private në Shqipëri zhvillohet përmes marrëveshjeve mes pronarëve dhe investitorëve të mundshëm. Së treti, ende nuk ka një plan përfundimtar, sepse ky është një proces gjatë të cilit institucionet tona qeveritare kanë qenë shumë, shumë të kujdesshme që projekti të përputhet me një sërë rregullash dhe standardesh që janë të rëndësishme për ne. Nuk e di se çfarë keni zbuluar ju.

ZDFheute: Sa i përket rolit të shtetit, ne kemi konstatuar se qeveria juaj ka ndryshuar disa ligje, duke zbutur mbrojtjen e natyrës. Është zvogëluar sipërfaqja e zonës së mbrojtur për të mundësuar ndërtimin e një aeroporti. Gjithashtu janë lejuar ndërtime në një zonë që më parë ishte e mbrojtur. Kritikët thonë se në këtë mënyrë ju keni lehtësuar investimin dhe, për rrjedhojë, shteti ka luajtur një rol aktiv.

Rama: Nuk është bërë asnjë ndryshim për të krijuar mundësi ndërtimi në zonat e mbrojtura, ku ndërtimi nuk lejohet. Zonat e mbrojtura në Shqipëri kanë një status të veçantë. Mbrojtja e tyre bazohet në kategoritë e Bashkimit Evropian dhe në parimin e praktikave më të mira. Kjo do të thotë se jo të gjitha zonat kanë të njëjtin nivel mbrojtjeje ndaj ndërhyrjeve dhe zhvillimit; ka kategori të ndryshme.

ZDFheute: Megjithatë, pikërisht në qendër të rezervatit natyror, punimet nisën disa javë më parë. Ndërkohë që ju thoni se deri tani ka vetëm plane dhe nuk është dhënë ende një leje ndërtimi. Ne kemi qenë atje dhe bëhet fjalë për qendrën e lagunës.

Rama: Nuk ka leje ndërtimi për atë zonë. Nga ana tjetër, sipas ligjit shqiptar, prona private mund të rrethohet. Nëse është dhënë një leje e përkohshme për fillimin e punimeve përgatitore, kjo përfshin edhe vlerësimin e ndikimit në mjedis.

ZDFheute: Por si mund të nisin punimet e para, siç thoni ju, kur çështja e pronësisë ende nuk është zgjidhur? Siç e dini, Gjykata e Lartë e Shqipërisë ka anuluar fitimin e të drejtës së pronësisë në të paktën dy raste dhe i ka kthyer ato për rigjykim në gjykatat më të ulëta.

Rama: Çdokush mund të ketë pretendime, por që një pretendim të shndërrohet në një të drejtë ligjore, ai duhet të konfirmohet nga një gjykatë. Deri atëherë, një pretendim nuk mjafton për të ndalur gjithçka derisa gjykata të vendosë ndryshe, sepse institucionet tona shtetërore veprojnë mbi bazën e dokumenteve dhe jo të pretendimeve. Për sa kohë një titull pronësie nuk është i juaji, nuk mund të pretendoni që prona të mos zhvillohet vetëm sepse mendoni se një ditë mund t’ju takojë.

ZDFheute: Por a nuk jeni ju, si kryeministër, përgjegjës për transparencën politike?

Rama: Transparenca është krejtësisht e dukshme. Është shumë e lehtë ta shohësh, por nëse nuk dëshiron ta shohësh, atëherë sigurisht që bëhet e padukshme. Si kryeministër i këtij vendi, unë nuk ju tregoj përralla. Përralla tregojnë të tjerët.
Versioni im është ky: Ka tituj të ndryshëm pronësie. Ekziston një marrëveshje mes pronarëve dhe investitorëve. Ky proces ka filluar.

ZDFheute: Autoritetet shqiptare kërkojnë që të respektohen rregullat dhe të bëhet një vlerësim i ndikimit në mjedis. Kjo pjesë e historisë bazohet në fakte. Pjesa tjetër bazohet në interpretim. Kjo do të thotë se ju vazhdoni t’i qëndroni projektit?

Rama: Ne nuk mund t’i themi thjesht “jo” një investimi prej më shumë se katër miliardë eurosh. Dhe nëse rezultati përfundimtar nuk është i kënaqshëm, nuk do të vazhdojmë me projektin.

ZDFheute: Ndërkohë, kjo çështje ka marrë edhe një dimension politik. Çdo ditë shqiptarët protestojnë kundër projektit të resortit luksoz në lagunë, kundër mungesës së transparencës dhe korrupsionit. Ata e quajnë këtë lëvizje “Revolucioni i Flamingove”. Si i përballoni këto protesta?

Rama: Nuk kam asgjë kundër njerëzve që protestojnë. Kundërshtoj vetëm ata që mendojnë se kanë të drejtë t’u japin leksione të tjerëve. Ata protestojnë sepse kanë të drejtë ta bëjnë këtë dhe sepse kanë shqetësimet dhe arsyet e tyre. Kanë të drejtë të shprehin mendimin e tyre, të protestojnë, të më kritikojnë dhe madje të jenë edhe kundër meje. Siç mund ta shihni, Zverneci nuk është më në qendër të protestave. Kjo çështje ka javë që nuk është më tema kryesore e tyre. Flamingot kanë mbetur si simbol – sepse janë një simbol i fuqishëm – por njerëzit kanë shumë arsye të ndryshme për të dalë në rrugë. Dhe unë i kuptoj. Nuk po flas për ta. Lëvizja e protestës përbëhet nga dy pjesë. Nga njëra anë janë qytetarët e zakonshëm. Për ta kam respekt të madh dhe përpiqem të kuptoj se çfarë i shtyn të protestojnë. Nga ana tjetër janë organizatorët, nxitësit dhe ata që i drejtojnë e i kontrollojnë këto protesta. Pikërisht atyre u referohem kur flas për “udhëzime”. Këto janë dy gjëra krejtësisht të ndryshme./