Bordi i Qarkut Washtenaw miraton 500,000 dollarë për Planned Parenthood
Bordi i Komisionerëve të Qarkut Washtenaw votoi për dërgimin e 500,000 dollarëve nga fondet lokale për Planned Parenthood of Michigan. Paula Thornton Greear, presidentja dhe drejtoresha ekzekutive e organizatës, tha se ky financim do të ndihmojë në ruajtjen e aksesit ndaj shërbimeve të nevojshme shëndetësore dhe do të mbështesë përpjekjet për zgjidhje afatgjata që të arrijnë të gjithë ata që kanë nevojë për kujdes.
Sipas michigannewssource, Komisionerja Katie Scott, e Qarku 9 dhe kryetare e Bordit, e përshkroi reduktimin e financimeve federale si një “kërcënim” dhe tha se vota ishte e fokusuar në kujdesin shëndetësor dhe në mbrojtjen e aksesit për qytetarët. Të gjithë anëtarët e Bordit të Qarkut Washtenaw janë demokratë.
Kritikët thanë se vendimi është një keqpërdorim i parave të taksapaguesve. Amber Roseboom, presidente e Right to Life of Michigan, i quajti fondet një përdorim të papranueshëm, duke vënë në dukje se, sipas raportit kombëtar të Planned Parenthood për 2024–2025, organizata raportoi 434,450 aborte në të gjithë vendin. Ajo gjithashtu theksoi se klinikat e Planned Parenthood nuk kryejnë mamografi apo teste diagnostikuese për kancerin e gjirit, por e referojnë pacienten te spitalet ose qendrat e imazherisë. Në diskutim u përmend edhe fakti që aborti është i ligjshëm në Michigan deri në nëntë muaj shtatzëni për çdo arsye dhe se pilula e abortit përbën afro 70% të procedurave, e disponueshme në klinika dhe përmes postës. Ofertat e kontraceptivëve që përmend Planned Parenthood konsiderohen më pak të rëndësishme nga disa kritikë, pasi shteti ofron tani kontraceptivë pa recetë. Sipas të dhënave shtetërore, Departamenti i Shëndetit dhe Shërbimeve Njerëzore të Michigan (MDHHS) administron më shumë se 130 milion dollarë në vit për të mbështetur 45 departamente lokale të shëndetit.
Siç raporton michigannewssource, kjo vendimmarrje erdhi njëkohësisht me rifillimin e financimit të Medicaid-it, pas një periudhe njëvjeçare në të cilën fondet federale ishin ndërprerë.
