Aplikim për Pasaportë dhe Kartë Identiteti

Procedura e plotë për pasaportë biometrike

Pajisja me pasaportë biometrike dhe kartë identiteti për shtetasit shqiptarë në SHBA bëhet pranë Konsullatës së Përgjithshme në Nju Jork, e cila mbulon Michigan-in dhe shtetet e tjera lindore.

Hapi 1: Aplikimi online në e-Albania

I gjithë procesi fillon nga portali e-Albania.al. Aplikimi NUK mund të bëhet drejtpërdrejt në Konsullatë — duhet të kaloni domosdoshmërisht nga aplikimi online.

1. Identifikohuni në e-Albania (nëse nuk keni llogari, krijoni një)
2. Kërkoni shërbimin “Aplikim për pasaportë dhe kartë identiteti”
3. Plotësoni formularin me të dhënat tuaja
4. Ngarkoni fotografinë në standardin 4x5cm (jpg/png)
5. Zgjidhni Konsullatën e Përgjithshme në Nju Jork si zyrë aplikimi
6. Dorëzoni aplikimin

Hapi 2: Pritja e konfirmimit

Pas dorëzimit të aplikimit në e-Albania, do të merrni një email me statusin e aplikimit:

• “Pranuar”: Aplikimi është i rregullt; merrni udhëzime për pagesën dhe takimin.
• “Plotësim dokumentesh”: Brenda 10 ditëve duhet të plotësoni dokumentet që mungojnë.
• “Refuzuar”: Aplikimi nuk plotëson kriteret.

Hapi 3: Pagesa

Pagesa kryhet me money order në emër të:

Consulate General of Albania

• $258 — për pasaportë + kartë identiteti
• $240 — vetëm pasaportë

Kujdes: Çeqet personale, kartat e kreditit dhe paratë cash nuk pranohen. Vetëm money order.

Hapi 4: Takimi në Konsullatë

Pas konfirmimit të pagesës, Konsullata do t’ju caktojë një takim. Në datën e takimit duhet të paraqiteni personalisht me:

• Mandatin origjinal të money order-it
• Dokumentet identifikuese
• Pasaportën e vjetër (nëse rinovohet)
• Çertifikatën e lindjes (për aplikim të parë)

Në Konsullatë do të merren shenjat e gishtave dhe nënshkrimi biometrik.

Hapi 5: Marrja e dokumentit

Pasaportat dhe kartat e identitetit prodhohen vetëm në Shqipëri. Procesi i prodhimit dhe transportit zgjat rreth 6 javë. Konsullata do t’ju kontaktojë kur dokumenti të jetë gati për tërheqje.

Pasaportë emergjente

Për situata emergjente (humbje pasaporte, vdekje familjare në Shqipëri, etj.), ekziston procedura e aplikimit emergjent që zvogëlon kohëzgjatjen në 1-7 ditë. Kjo procedurë kërkon dokumentacion shtesë dhe pranohet vetëm në raste vërtet urgjente.