ANALIZË – Dobësimi politik i Trumpit i jep Pekinit avantazh në përballjen tregtare me SHBA-në, por rrit pasiguritë për të ardhmen

UASHINGTON/PEKIN, 6 nëntor /ATSH/ -Humbja e republikanëve të presidentit amerikan Donald Trump në zgjedhjet e mesmandatit mund të forcojë pozitat negociuese të Kinës në marrëdhëniet tregtare me Uashingtonin, por Pekini është i vetëdijshëm se ky avantazh mund të jetë i përkohshëm dhe se një administratë e ardhshme amerikane mund të ndjekë një politikë edhe më të ashpër ndaj tij.

Sipas një analize të Reuters, rezultati zgjedhor pritet të ndikojë në mënyrën se si zhvillohen marrëdhëniet mes dy fuqive më të mëdha ekonomike, veçanërisht në një moment kur armëpushimi tregtar mes tyre po i afrohet skadimit.

Pakënaqësia e votuesve amerikanë ndaj rritjes së kostos së jetesës, e ndikuar edhe nga luftërat tregtare të administratës Trump me Kinën dhe vende të tjera, kontribuoi në humbjen e republikanëve dhe marrjen e kontrollit të Kongresit nga demokratët.

Ky zhvillim mund ta bëjë presidentin amerikan më të kujdesshëm në marrëdhëniet me Pekinin, pasi përballja me një Kongres të kontrolluar nga opozita kufizon hapësirën e tij politike për të ndërmarrë masa që mund të shkaktojnë pasoja të reja ekonomike.

Për Kinën, kjo situatë krijon mundësinë për të kërkuar kushte më të favorshme në negociatat tregtare, përfshirë uljen e tarifave amerikane dhe koncesione të tjera ekonomike. Vëmendja është përqendruar te takimi i planifikuar mes Trumpit dhe presidentit kinez Xi Jinping në kuadër të samitit të APEC-ut në Shenzhen, gjatë këtij muaji, si dhe takimi i tyre në Majemi në dhjetor, në kuadër të samitit të G20-s.

Në tryezën e negociatave do të jetë edhe armëpushimi tregtar, i cili përfundon në janar dhe që deri tani ka shmangur një përshkallëzim të ri të konfliktit ekonomik mes dy vendeve.

Megjithatë, Pekini nuk e konsideron dobësimin politik të Trumpit një fitore të sigurt.

Analistët vlerësojnë se Kina mund ta shfrytëzojë periudhën e mbetur të presidencës së tij për të forcuar ekonominë, për të diversifikuar marrëdhëniet tregtare dhe për të zvogëluar varësinë nga tregu amerikan.

Sipas ish-zyrtarit të Ministrisë së Jashtme kineze, Shen Weizhong, udhëheqja e Pekinit është e vetëdijshme se një president i ardhshëm amerikan mund të ketë një qasje krejtësisht të ndryshme ndaj Kinës. Për këtë arsye, edhe dy vite stabilitet në marrëdhëniet me Uashingtonin do t’i jepnin Pekinit kohë për t’u përgatitur për një periudhë të re rivaliteti.

Një nga çështjet më të ndjeshme që mund të tensionojë marrëdhëniet është Tajvani. Kongresi i kontrolluar nga demokratët mund të ushtrojë presion më të madh ndaj Trumpit për të zhbllokuar një paketë armësh amerikane me vlerë 14 miliardë dollarë për ishullin.

Presidenti amerikan e ka mbajtur pezull këtë marrëveshje, duke e konsideruar furnizimin me armë një instrument negociues në marrëdhëniet me Xi Jinpingun.

Por për Pekinin, çdo avancim i kësaj marrëveshjeje përbën një vijë të kuqe, pasi Kina e konsideron Tajvanin pjesë të territorit të saj dhe kundërshton mbështetjen ushtarake amerikane për autoritetet e ishullit.

Analistët paralajmërojnë se zhbllokimi i paketës mund të shkaktojë reagim të fortë nga Kina dhe të rrisë tensionet në rajonin e Azisë Lindore.

Një tjetër shqetësim për Pekinin lidhet me mundësinë që presidenti Trump, i kufizuar nga zhvillimet politike në vend, të kërkojë suksese më të mëdha në politikën e jashtme.

Sipas Chim Lee, analist i lartë për Kinën në” Economist Intelligence Unit”, drejtimi i përgjithshëm i politikës amerikane ndaj Pekinit mund të mos ndryshojë, por rreziku qëndron te vendimet më pak tradicionale dhe të paparashikueshme të administratës Trump.

Këto mund të sjellin pasoja të papritura për interesat kineze, veçanërisht në fushën e sigurisë ndërkombëtare.

Në këtë kontekst, një përshkallëzim i mundshëm i luftës me Iranin në një konflikt më të gjerë rajonal do të përbënte një tjetër sfidë për Kinën.

Një krizë e tillë mund të shkaktonte rritje të qëndrueshme të çmimeve të naftës, duke kërcënuar sigurinë energjetike kineze dhe duke ndikuar në ekonominë e saj. Kina mbetet e ekspozuar ndaj zhvillimeve në Lindjen e Mesme, si për shkak të nevojave të mëdha energjetike, ashtu edhe për shkak të marrëdhënieve të saj ekonomike dhe diplomatike me vendet e rajonit.

Nga ana tjetër, Pekini mund të përpiqet të shfrytëzojë marrëdhëniet e ngushta me Rusinë dhe Korenë e Veriut për të fituar ndikim në negociatat me Uashingtonin.

Presidenti Trump mund të kërkojë ndihmën e Xi Jinpingut për të lehtësuar përpjekjet për përfundimin e luftës Rusi-Ukrainë ose për organizimin e një takimi tjetër me liderin koreano-verior Kim Jong Un.

Kina, e cila ruan lidhje të rëndësishme tregtare dhe diplomatike me Moskën dhe Phenianin, mund ta përdorë këtë ndikim për të kërkuar lëshime nga administrata amerikane.

Megjithatë, perspektiva afatgjatë mbetet më shqetësuese për Pekinin.

Disa nga figurat që mund të shihen si pasardhës të mundshëm të Trumpit, përfshirë sekretarin amerikan të Shtetit Marco Rubio, konsiderohen nga analistët si më të ashpër ndaj Kinës.

Një administratë e ardhshme mund të vendosë më shumë theks te konkurrenca strategjike, kufizimi i investimeve kineze, çështjet e të drejtave të njeriut dhe mbështetja për Tajvanin.

Kështu, humbja e republikanëve në zgjedhjet e mesmandatit krijon një situatë të ndërlikuar për marrëdhëniet SHBA-Kinë.

Në afat të shkurtër, Pekini mund të përfitojë nga nevoja e Trumpit për të ruajtur stabilitetin ekonomik dhe për të siguruar marrëveshje diplomatike.

Por në të njëjtën kohë, një Kongres më kritik ndaj Kinës mund të rrisë presionin për politika më të ashpra në çështjet e sigurisë dhe të tregtisë.

Në këto rrethana, strategjia e Kinës pritet të përqendrohet në shfrytëzimin e periudhës së mbetur të presidencës Trump për të forcuar pozitat ekonomike dhe diplomatike, duke shmangur përshkallëzimin e konflikteve me Uashingtonin.

Për Pekinin, sfida nuk është vetëm të përfitojë nga dobësimi politik i presidentit amerikan, por të përgatitet për një rivalitet që mund të bëhet edhe më i fortë në vitet e ardhshme.