Apeli ia zëvendëson arrestin shtëpiak, ish-drejtori i Spitalit të Mitrovicës shfaqet në stadium

Në mesin e shikuesve të ndeshjes Kosovë–Izrael në stadiumin “Fadil Vokrri” ishte edhe Gëzim Berisha, ish-drejtori i Spitalit të Përgjithshëm në Mitrovicë, i cili publikoi fotografi nga stadiumi në rrjetet sociale, siç njofton KosovaPress.

Berisha është i dyshuar për veprën penale “Dhunë në familje” ndaj ish-bashkëshortes së tij. Gjykata Themelore në Prishtinë më 5 nëntor i kishte caktuar masën e arrestit shtëpiak për një muaj, për periudhën 30 tetor – 29 nëntor.

Pas pyetjeve të KosovaPress, Gjykata njoftoi me shkrim se masa ishte ndryshuar. Zëdhënësja Mirlinda Gashi tha se Gjykata e Apelit, me aktvendimin PN.1DP.nr.1443/26, aprovoi ankesën e mbrojtësit dhe e zëvendësoi arrestin shtëpiak me masën e ndalimit për t’iu afruar personit të caktuar, pra viktimës, duke ndryshuar aktvendimin e Themelores PPR.nr.895/26.

Me këtë vendim, Berisha nuk është më në arrest shtëpiak, por i ndalohet t’i afrohet ish-bashkëshortes së tij. Prania e tij në stadium gjatë ndeshjes Kosovë–Izrael u bë publike përmes fotografive që ai vetë publikoi në rrjetet sociale.

Berisha aktualisht është i pezulluar nga pozita që mbante në Spitalin e Përgjithshëm në Mitrovicë. Rasti i tij ishte raportuar më parë në fillim të nëntorit, kur u bë i ditur pezullimi i tij nga detyra dhe caktimi i masës së arrestit shtëpiak.