Arlind Qori: “Humbja është imja, fitorja është e jona”
“Humbja është imja, fitorja është e jona.” Ky është një nga parimet që ka shoqëruar Arlind Qorin gjatë drejtimit të Lëvizjes BASHKË dhe që, sipas mbështetësve të tij, është reflektuar edhe në mënyrën se si ai ka ndërtuar organizatën politike.
Pas rizgjedhjes në krye të Lëvizjes BASHKË, Qori njoftoi se nuk do të kandidojë më për kryetar pas përfundimit të mandatit të dytë në vitin 2029. Sipas tij, tetë vite janë të mjaftueshme për të kuptuar nëse një drejtues ka arritur të realizojë objektivat ose jo.
Edhe më parë ai ka marrë vendime që janë interpretuar si përpjekje për t’u hapur rrugë figurave të tjera brenda lëvizjes. Në zgjedhjet parlamentare të vitit 2025, Qori vendosi të mos ishte i pari në listën e kandidatëve për deputetë, duke i lënë vendin Redi Muçit, sipas vendimit të Këshillit Koordinues.
Po ashtu, në zgjedhjet vendore të vitit 2023 ai nuk kandidoi për Këshillin Bashkiak të Tiranës, duke i hapur rrugën Mirela Rukos. Qëndrimi i tij ka qenë se “kryetari duhet të jetë aty ku gara është më e vështirë”, ndërsa drejtimi i organizatës ishte përgjegjësia kryesore që duhej të mbante në atë fazë.
Sipas drejtuesve të Lëvizjes BASHKË, edhe pranimi i postit të kryetarit nuk ishte një objektiv personal i Qorit, por një përgjegjësi që ai mori për të ndihmuar në ndërtimin e identitetit publik të organizatës në vitet e para të saj.
Mbështetësit e kësaj filozofie sjellin si shembuj dy prej figurave të dala nga radhët e lëvizjes. Redi Muçi konsiderohet sot një nga deputetët më aktivë të Kuvendit të Shqipërisë, ndërsa Mirela Ruko është vlerësuar për qëndrimet e saj kritike në Këshillin Bashkiak të Tiranës, ku shpesh ka ngritur çështje që, sipas tyre, nuk trajtohen nga pjesa tjetër e këshilltarëve.
Sipas këtij këndvështrimi, forca e një organizate politike matet jo vetëm me suksesin e drejtuesit të saj, por edhe me aftësinë për të krijuar një brez të ri përfaqësuesish dhe drejtuesish. Pikërisht mbi këtë logjikë mbështetet edhe vendimi i Arlind Qorit për të kufizuar kohën e tij në drejtimin e Lëvizjes BASHKË.
Mbështetësit e tij shprehen të bindur se deri në zgjedhjet e vitit 2029 lëvizja do të ketë zgjeruar përfaqësimin e saj parlamentar dhe do të ketë krijuar një ekip më të gjerë drejtuesish. Nga ana tjetër, ata pranojnë se deklarata e Qorit për të mos kandiduar më pas vitit 2029 do të vihet në dyshim nga kundërshtarët politikë, por argumentojnë se vlerësimi i saj i takon kohës dhe respektimit të angazhimit të bërë publik.
