Banksy konfirmon skulpturën e re në qendër të Londrës: një burrë me fytyrë të mbuluar nga një flamur

Artisti i njohur Banksy njoftoi se skulptura e re e vendosur në qendër të Londrës, që paraqet një burrë duke ecur nga një podium me fytyrën të mbuluar nga një flamur, është punë e tij. Në një video me nuanca humori që publikoi në llogarinë e tij në Instagram, ai tregon fragmente nga vendosja e punimit gjatë natës.

Sipas Associated Press, statuja duket se u vendos në orët e hershme të mërkurës mbi një podium në një ishull trafiku në Waterloo Place, pranë Pallatit Buckingham. Para konfirmimit të autorit, banorë dhe turistë u mblodhën për ta parë dhe dyshuan se bëhej fjalë për Banksy, pasi në bazën e podiumit ishte shkruar nënshkrimi i tij. Ajo ndodhet afër monumenteve të Mbretit Edward VII, Florence Nightingale dhe Përkujtimores së Luftës së Krimesë.

Raporti vë në dukje se skulpturat nuk kanë qenë kryesisht mediumi për të cilin është i njohur Banksy; reputacionin ai e fitoi me stencila dhe piktura murale që nisën të shfaqeshin në Bristol në fillim të viteve 1990. Krijimet e tij janë shitur për miliona dollarë në ankand, shpesh janë objekt i vjedhjeve dhe vandalizmit, dhe ai nuk ka zbuluar kurrë publikisht identitetin e tij, raporton Associated Press.