Bashkimi Evropian gjobit Google me 890 milionë euro për praktikat në Play dhe në motorin e kërkimit

Bashkimi Evropian vendosi të gjobisë Google me 890 milionë euro, duke konkluduar se kompanitë e teknologjisë kanë shkelur rregullat antitrust dixhitale duke strukturuar Google Play dhe motorin e kërkimit në mënyrë që të drejtojnë përdoruesit drejt shërbimeve dhe aplikacioneve të veta, në dëm të konkurrentëve dhe zgjedhjes së konsumatorëve.

Siç raporton CBS News, Komisioni Evropian argumentoi se masat ndiqnin interesin e konsumatorëve dhe se produktet duhet të fitojnë në treg sepse janë më të mira, jo sepse i përkasin kompanisë që kontrollon motorin e kërkimit. Përfaqësues të institucionit thanë gjithashtu se zhvilluesit e aplikacioneve kanë të drejtë t’u tregojnë përdoruesve ofertat më të mira, edhe kur pronari i dyqanit të aplikacioneve nuk përfiton nga transaksionet.

Google reagoi me kritika, duke thënë se gjoba dhe kërkesat e reja të rregullatorit do të dëmtonin bizneset dhe konsumatorët evropianë. Presidenti për Çështjet Globale të Google, Kent Walker, u shpreh se disa kërkesa të ligjit të tregjeve digjitale detyrojnë kompaninë të heqë funksione të kërkimit në kohë reale që përdoruesit i vlerësojnë, si informacioni i çmimeve dhe disponueshmëria direkte për hotele, fluturime dhe restorante, si dhe mbrojtje të sigurisë në Google Play. Zyrtarë të Komisionit nënvizuan se bizneset kanë të drejtën të konkurrojnë në mënyrë të ndershme dhe që “gatekeeper”-at duhet të sigurojnë një fushë loje të barabartë.

Vendimi vjen pasi Google humbi gjithashtu një apel për një gjobë tjetër antitrust prej 4.5 miliardë dollarësh lidhur me dominimin e sistemit Android, ndërsa Brukseli vazhdon të ushtrojë presion rregullator mbi kompanitë e mëdha të teknologjisë. Sipas CBS News, komisioni tha se veprimi ishte i nevojshëm për të mbrojtur konkurrencën dhe zgjedhjet e konsumatorëve.