Departamenti i Drejtësisë lejon përdorimin e skuadrave ekzekutuese për vrasjet me dënim me vdekje
Departamenti i Drejtësisë në SHBA ka vendosur të lejojë përdorimin e skuadrave ekzekutuese si metodë për kryerjen e dënimeve me vdekje, në kuadër të një iniciative për përshpejtimin dhe intensifikimin e këtyre proceseve gjatë administratës së ish-presidentit Trump.
Gjithashtu, Departamenti po riaufton përdorimin e injeksioneve të një lënde të vetme vdekjeprurëse me pentobarbital, që u përdorën në 13 ekzekutime gjatë administratës së parë të Trumpit, duke thyer rekordin historik të përdorimit të kësaj metode nga ndonjë president modern.
Administrata e Bidenit e kishte hequr pentobarbitalin nga protokolli federal për shkak të shqetësimeve lidhur me mundësinë e shkaktimit të dhimbjeve dhe vuajtjeve të panevojshme gjatë ekzekutimeve.
Këto ndryshime vijnë pas një moratoriumi federal mbi ekzekutimet gjatë qeverisjes së Bidenit. Aktualisht, vetëm tre të dënuar gjenden në radhët e vdekjes federale pasi Presidenti Biden ka konvertuar dënimet e 37 prej tyre në burgim të përjetshëm. Ndërkohë, administrata Trump ka autorizuar kërkimin e dënimit me vdekje për 44 të akuzuar.
Prokurori i Përgjithshëm në detyrë, Todd Blanche, deklaroi se administrata e mëparshme dështoi në detyrën për të mbrojtur popullin amerikan, duke mos ndjekur dhe zbatuar dënimin më të lartë ndaj kriminelëve më të rrezikshëm, përfshirë terroristët, vrasësit e fëmijëve dhe vrasësit e policëve. Nën udhëheqjen e Presidentit Trump, Departamenti i Drejtësisë sërish po zbatojnë ligjin dhe qëndrojnë pranë viktimave.
Sipas Qendrës për Informacion mbi Dënimin me Vdekje, qeveria federale nuk ka përfshirë më parë skuadrat ekzekutuese si një metodë të pranueshme, ndërsa pesë shtete aktualisht lejojnë ekzekutimet me skuadra ekzekutuese: Ajdaho, Misisipi, Oklahoma, Karolina e Jugut dhe Utah.
Protokolli mbi përdorimin e pentobarbitalit u miratua nga Bill Barr, prokurori i përgjithshëm gjatë mandatit të parë të Trumpit, për të zëvendësuar përzierjen me tre droga që ishte përdorur në vitet 2000, periudhë kur u kryen ekzekutimet federale para administratës së Trumpit.
Prokurori i Përgjithshëm Merrick Garland, në fund të administratës së Bidenit, hoqi politikën e injeksioneve me pentobarbital pas një rishikimi shkencor dhe mjekësor që theksoi se ekzistonte “pasiguri e konsiderueshme” nëse përdorimi i këtij medikamenti shkaktonte dhimbje dhe vuajtje të panevojshme.
Në vitin 2020, nën drejtimin e Barr-it, Departamenti i Drejtësisë publikoi një rregull që lejon qeverinë federale të kryejë ekzekutime me injeksion vdekjeprurës ose “çfarëdo mënyre tjetër të përcaktuar nga ligji i shtetit ku është shqiptuar dënimi”. Disa shtete lejojnë metoda të tjera, si elektrifikimi, gazi i azotit apo vrasjet me skuadra ekzekutuese.
Në raportin e publikuar të premten, administrata e Trump-it vlerëson se administrata e Biden e “kuptoi gabim standardin dhe shkencën” lidhur me përdorimin e pentobarbitalit, duke mos marrë parasysh provat që tregojnë se substanca e bën të dënuarin të humbasë shpejt ndërgjegjen dhe të mos ndjejë dhimbje.
Të burgosurit aktualë në radhën e vdekjes federale përfshijnë Dylann Roof, përgjegjës për vrasjet raciste të nëntë anëtarëve të Kishës Mother Emanuel AME në Charleston, Karolina e Jugut; Dzhokhar Tsarnaev, përgjegjës për sulmin në Maratonën e Bostonit në 2013; dhe Robert Bowers, i cili vrau 11 veta në sinagogën Tree of Life në Pittsburgh në 2018, sulmi më vdekjeprurës antisemit në historinë e SHBA-së.
