Dëshmitari në gjyqin e Clase dhe Ortiz: Informacionet për hedhjet u ndalën pas skandalit të Ohtanit
Luis de Aza Baez dëshmoi të premten në Brooklyn se fitoi mijëra dollarë me informacione të brendshme për hedhjet e Clase në 2023, por rrjedha u ndërpre në 2024 pas rritjes së kontrollit nga çështja e përkthyesit të Shohei Ohtanit.
Gjyqi federal kundër hedhësve të Cleveland Guardians, Emmanuel Clase dhe Luis Ortiz, njohu të premten një dëshmi të re në Brooklyn. Sipas raportimit të ESPN, të përcjellë nga New York Post, dëshmitari i qeverisë Luis de Aza Baez, një shofer Uber-i, ka treguar se duke filluar nga viti 2023 ka marrë informacione për hedhjet e Clase nga bashkëpunëtori i hedhësit, Enoc Pena, përmes një grupi bisede të quajtur “Uber Inc.”, ku bënin pjesë edhe shoferë të tjerë.
De Aza Baez ka dëshmuar se ka vendosur dhjetëra baste dhe ka fituar mijëra dollarë duke vënë bast për shpejtësinë e hedhjeve të zgjedhura të Clase gjatë sezonit 2023, “sepse kisha informacione të brendshme”. Clase akuzohet se ka komplotuar me bastvënësit për të manipuluar 18 hedhje gjatë tre sezoneve. Dëshmitari ka sqaruar se Clase nuk i ka dhënë kurrë informacion drejtpërdrejt — gjithçka vinte përmes Penas — dhe ka pranuar se “pothuajse gjithmonë” fitonte në hedhjet e relievuesit.
Kur në sezonin 2024 ka kërkuar sërish informacione, atij i është thënë se “për shkak të asaj që po ndodhte me Ohtanin, nuk kishte më informacione të tilla”. Në mars 2024, Shohei Ohtani u rrethua nga polemikat pasi u raportua se miliona dollarë ishin dërguar nga llogaria e tij bankare në një skemë të paligjshme bastesh. Përkthyesi i tij, Ippei Mizuhara, më vonë u deklarua fajtor se i kishte vjedhur gati 17 milionë dollarë yllit tre herë MVP për të shlyer borxhet e basteve; Mizuhara po vuan një dënim me 57 muaj burg, ndërsa Ohtani u pastrua nga çdo shkelje.
De Aza Baez ka thënë se është prezantuar me Clase nga Pena dhe bashkë-i-pandehuri Robinson Vasquez Germosen në një festë ditëlindjeje më 28 prill 2023. Ai ka pranuar gjithashtu marrëveshjen me qeverinë për të humbur (forfeit) 69,000 dollarë fitime të lidhura me performancat e Clase dhe për të “thënë të vërtetën”, në këmbim të heqjes nga prokuroria të një akuze të lidhur për mashtrim elektronik (wire fraud).
Clase, Ortiz dhe Vasquez janë deklaruar të pafajshëm për të gjitha akuzat. “Mbrojtja jonë është e njëjtë sot si në hapje: kjo është një çështje për fjalë të mëdha dhe baste të vogla”, i ka thënë ESPN pas seancës së të premtes avokati i Vasquez, Todd Spodek. Gjyqi federal vazhdon të enjten në Brooklyn.
