Detroit prezanton planin me 6 pika për sigurinë publike para sezonit veror
Ndërsa temperaturat rriten dhe qyteti hyn në muajt e verës, autoritetet në Detroit kanë prezantuar një plan të ri për të parandaluar rritjen sezonale të kriminalitetit. Kryebashkiakja Mary Sheffield dhe shefi i policisë Todd Bettison shpallën një strategji me gjashtë pika, e fokusuar te siguria në lagje, zgjidhja e konflikteve dhe angazhimi i të rinjve.
“Parandalim, ndërhyrje dhe zbatim i ligjit,” deklaroi Sheffield, duke përmbledhur qasjen që qyteti synon të ndjekë gjatë muajve në vijim.
Plani vjen pas një serie ngjarjesh të njohura si “grumbullime të të rinjve” në qendër të Detroitit, si dhe shqetësimeve në rritje për gara të paligjshme makinash në rrugët e qytetit.
Një pjesë e komunitetit nuk i sheh këto grumbullime vetëm si problem sigurie. Demetris Jones, bashkëpronar i dyqanit Culture në qendër të qytetit, përshkroi një rast kur një grup i madh të rinjsh hyri në dyqanin e tij.
“Ata nuk vodhën asgjë. Nuk ishin aty për të vjedhur — thjesht donin të tregonin praninë e tyre,” u shpreh Jones.
Sipas tij, problemi lidhet më shumë me mungesën e hapësirave dhe mundësive për të rinjtë, sesa me sjelljen e tyre.
“Kur u jep diçka për të bërë dhe i trajton si njerëz, si fëmijë normalë — ata të respektojnë. Nëse i trajton si problem, ata reagojnë si të tillë,” shtoi ai.
Megjithatë, autoritetet theksojnë se plani përfshin edhe masa të forta zbatimi të ligjit. Policia e Detroitit do të rrisë praninë në parqe dhe qendra rekreative për të parandaluar sjelljet e rrezikshme.
Të miturit që gjenden jashtë orarit të ndalim-qarkullimit (curfew) do të ndalohen nga policia, ndërsa prindërit mund të përballen me gjoba — 250 dollarë për shkeljen e parë dhe 500 dollarë për përsëritje.
Shefi i policisë Bettison u bëri thirrje familjeve që të jenë pjesë e zgjidhjes.
“Po u kërkojmë familjeve të jenë partnere me ne — kjo ka të bëjë me sigurinë e fëmijëve tanë. Duhet të dini se ku janë fëmijët tuaj,” theksoi ai.
Zyrtarët e qytetit bëjnë të ditur se plani do të zgjerohet gjatë dy muajve të ardhshëm, me masa shtesë ndërsa afrohet vera. Ata nënvizuan se mbështetja e komunitetit do të jetë vendimtare për suksesin e kësaj nisme.
