Dingell dhe Malliotakis propozojnë ligj për heqjen e pensioneve të kongresistëve të dënuar për krime seksuale
Dy anëtarë të Dhomës së Përfaqësuesve, nga dy partitë kryesore, paraqitën një projektligj që synon heqjen e përfitimeve të pensioneve të financuara nga taksapaguesit për anëtarët e Kongresit të dënuar për vepra të rënda seksuale. Kongresistja Debbie Dingell (D-Michigan) dhe Nicole Malliotakis (R-New York) prezantuan projektligjin “End Government Pension for Sexual Abusers Act”, i cili do të revokonte pensionet për anëtarët aktualë ose ish-anëtarët e Kongresit të shpallur fajtorë për krime si sulmi seksual, përdhunimi, trafikimi seksual i fëmijëve dhe shfrytëzimi seksual i të miturve.
Ligji parashikon gjithashtu zbatimin për dënime të ngjashme në vende të huaja dhe përcakton që çdo përfitim i hequr nga një i dënuar ti kalojë viktimave në vend që të kthehet te qeveria federale; raporton CBS News. Dingell tha se nisma u nxit pjesërisht nga dorëheqjet e disa anëtarëve të Kongresit muajt e fundit pas pretendimeve për sjellje dhe abuzime seksuale: “Shërbimi publik është një privilegj, dhe kushdo i shpallet fajtor për këto krime të tmerrshme nuk duhet të marrë pension të financuar nga taksapaguesit,” theksoi ajo.
Teksti i projektligjit përmend veprat specifike që mbulohen, përfshirë transferimin ose prodhimin e materialeve të pahijshme për minorenët, trafikimin seksual të fëmijëve, sulmin seksual ose përdhunimin, shfrytëzimin seksual të një të mituri dhe abuzimin që rezulton në vdekje. Sipas dispozitave të propozuara, fondet e përfituara nga konfiskimi i pensioneve do ti jepen viktimave, me qëllim rritjen e llogaridhënies së zyrtarëve publikë; sipas CBS News, nisma u paraqit në një kohë kur debate dhe dorëheqje të lidhura me abuzimet seksuale kanë shtyrë kërkesa për masa më të ashpra kundër abuzuesve në pushtet.
