Dita e dytë e negociatave në Abu Dhabi, Zelensky: Gati të diskutoj territoret drejtpërdrejt me Putinin
Negociatat mes Rusisë, Ukrainës dhe Shteteve të Bashkuara në Abu Dhabi kanë hyrë sot në ditën e dytë, siç njofton Shqiptarja.com. Bisedimet u rifilluan këtë mëngjes dhe janë bisedimet e para të drejtpërdrejta mes Rusisë dhe Ukrainës pas nëntë muajsh.
Ndërkohë, një sulm me dronë shkaktoi zjarr në zonën e portit të Ust-Lugës, në Detin Baltik, në veri-perëndim të Rusisë. Porti është një nga qendrat më të rëndësishme të eksportit të naftës në Rusinë perëndimore dhe është sulmuar vazhdimisht nga Ukraina.
Guvernatori i rajonit të Leningradit, Aleksandr Drozdenko, njoftoi përmes Telegramit se 146 dronë u rrëzuan mbi rajonin e Leningradit, ku ndodhen një rafineri e rëndësishme nafte dhe Shën Petersburgu. Ky është pretendimi i palës ruse.
Ushtria ruse sulmoi gjithashtu sot me dronë qytetin Kryvyi Rih, duke e lënë atë pa energji elektrike. Autoritetet raportojnë të paktën një të vrarë dhe 12 të plagosur, mes tyre edhe fëmijë.
Presidenti ukrainas Volodymyr Zelensky, nga Kopenhaga, tha se zyrtarë ushtarakë dhe të inteligjencës ruse paraqitën pretendime të rreme në bisedimet në Abu Dhabi për luftimet dhe kontrollin e territoreve të Donbasit që janë ende nën kontrollin ukrainas. Sipas tij, përfaqësuesit rusë pretenduan kontrollin e rreth gjysmës së Donbasit, i cili është ende nën kontrollin ukrainas, ndërsa negociatorët ukrainas iu përgjigjën me prova filmike dhe fotografike. Ai shtoi se Putini u kishte thënë negociatorëve amerikanë se Rusia mund të merrte territoret e mbetura të Ukrainës lindore brenda pak muajsh.
“Besoj se Putini jeton në një lloj flluske tjetër informative. Ai jeton në një realitet tjetër”, tha Zelensky. Pavarësisht mosmarrëveshjeve, ai u shpreh i gatshëm të diskutojë çështjet territoriale drejtpërdrejt me Putinin, me ndërmjetësimin e Shteteve të Bashkuara dhe të Evropës.
