Estonia mbyll të gjitha pikat kufitare me Rusinë nga 1 dhjetori pas tentativës për zjarrvënie ndaj prodhuesit të dronëve
Estonia do të mbyllë të gjitha pikat e saj kufitare me Rusinë duke filluar nga 1 dhjetori, njoftoi të dielën ministri i Jashtëm i vendit, pas një sulmi të dyshuar sabotues ndaj një kompanie estoneze të mbrojtjes, për të cilin Talini fajëson Moskën, siç njofton Reuters.
Vendimi vjen pasi autoritetet estoneze ndaluan gjatë natës tetë persona, të dyshuar për një tentativë zjarrvënieje ndaj prodhuesit të dronëve Threod Systems. Sipas autoriteteve, sulmi ishte urdhëruar nga shërbimi i inteligjencës ushtarake ruse, GRU.
«Rusia duhet të kuptojë se veprimet armiqësore kundër Estonisë kanë pasoja», shkroi ministri i Jashtëm Margus Tsahkna në një postim në X. Ai nuk specifikoi se sa do të zgjasë mbyllja e kufirit, as nëse është caktuar një datë përfundimi.
Estonia, vend anëtar i NATO-s dhe i Bashkimit Evropian dhe mbështetëse e fortë e Ukrainës, ka aktualisht tri pika kufitare të hapura me Rusinë — në Narva, Luhamaa dhe Koidula — të cilat lejojnë kalimin e këmbësorëve dhe të mallrave, sipas transmetuesit publik estonez ERR.
Nga Moska nuk ka pasur ende asnjë koment për akuzat e Estonisë apo për vendimin për mbylljen e pikave kufitare. Rusia i ka mohuar rregullisht akuzat e autoriteteve evropiane për përfshirje në operacione sabotimi.
