Festivali Ndërkombëtar i Filmit i Detit të Kuq anulon edicionin 2026 — kthehet në fund të 2027-ës

Sean Baker në tapetin e kuq të edicionit 2025 të Festivalit Ndërkombëtar të Filmit i Detit të Kuq në Xhedah, Arabi Saudite. (Foto: Segolene Liger / Wikimedia Commons)

Fondacioni i Filmit i Detit të Kuq njoftoi të hënën se ka anuluar edicionin 2026 të Festivalit Ndërkombëtar të Filmit i Detit të Kuq (Red Sea International Film Festival) — ngjarjen më të rëndësishme të kinematografisë dhe tregun më të madh të filmit në botën arabe. Edicioni i gjashtë, i planifikuar nga 3 deri më 12 dhjetor 2026 në Xhedah të Arabisë Saudite, është shtyrë për në tremujorin e katërt të vitit 2027.

“Vendimi erdhi pas një rishikimi gjithëpërfshirës të një sërë konsideratash që kanë të bëjnë me kohën e edicionit të ardhshëm, përfshirë kërkesat logjistike të organizimit të një eventi ndërkombëtar të kësaj përmase,” thuhet në deklaratën e Fondacionit. “Ai reflekton angazhimin e Fondacionit që Festivali të zhvillohet në kohën e duhur dhe në kushtet e duhura, për të ofruar përvojën për të cilën Festivali Ndërkombëtar i Filmit i Detit të Kuq është bërë i njohur.”

Njoftimi vjen në një moment kur i gjithë rajoni përballet me tensionet e vazhdueshme ushtarake mes luftës SHBA–Izrael–Iran, me kërcënimin aktiv të goditjeve me raketa dhe dronë. Arabia Saudite përballet me sulme të shënjestruara nga rebelët huthi të Jemenit të mbështetur nga Irani — javën e kaluar zyrtarët sauditë njoftuan se kishin rrëzuar një dron huthi pranë Mekës, qytetit më të shenjtë të Islamit, vetëm rreth 80 kilometra larg Xhedahut. Më herët këtë vit, edhe Çmimi i Madh i Arabisë Saudite në Formula 1 në pistën e Xhedahut u anulua për shkak të pasojave të luftës rajonale.

Festivali, i themeluar në vitin 2021 pas heqjes së ndalimit 35-vjeçar të kinemasë në Arabinë Saudite, është shndërruar me shpejtësi në një lojtar të madh në kalendarin global të kinemasë, duke tërhequr çdo vit kineastë, yje të Hollywood-it dhe pesha të rënda të industrisë. Edicioni i kaluar mblodhi në Xhedah emra si Michael Caine, Johnny Depp, Sean Baker, Juliette Binoche, Adrien Brody, Kirsten Dunst, Jessica Alba dhe Queen Latifah.

Organizatorët janë zotuar se festivali do të kthehet në vitin 2027 me një “vizion të ripërtërirë dhe një program që vazhdon të kremtojë kinemanë dhe kineastët nga Arabia Saudite, rajoni dhe e gjithë bota.” Ndërkohë, duke filluar nga nëntori 2026, Fondacioni do të nisë programim gjatë gjithë vitit në Sheshin e Kulturës (Culture Square) në Xhedahun historik — selia e re e festivalit në lagjen Al-Balad — duke e shndërruar atë në një destinacion të përhershëm për shfaqje filmash, ngjarje kulturore dhe programe të specializuara për industrinë e filmit.

Iniciativat e tjera të Fondacionit — Red Sea Fund, Red Sea Labs dhe programet e zhvillimit — do të vazhdojnë të funksionojnë normalisht brenda “ekosistemit gjatë gjithë vitit” të Fondacionit, siguroi deklarata.

Burimi: Deadline