“Game Over” në Shkodër, zbulohet lokal me lojëra fati në Bajzë, shpërndahej dhe kokainë

Policia e Shkodrës ka finalizuar një tjetër operacion kundër lojërave të fatit të paligjshme dhe shpërndarjes së lëndëve narkotike, të koduar “Game Over”.

Gjatë kontrolleve të zhvilluara mbrëmjen e së martës në një lokal në fshatin Bajzë, është zbuluar një ambient ku ushtrohej aktivitet i paligjshëm i lojërave të fatit dhe dyshohet se shitej dhe lëndë narkotike kokainë.

“Në vendngjarje janë gjetur dhe sekuestruar doza kokaine, një makinetë për lojëra fati, 4 celularë të përdorur për aktivitetin e paligjshëm, pije alkoolike të dyshuara të kontrabanduara si dhe një shumë parash e dyshuar e përfituar nga veprimtaria kriminale ndërsa në pranga ka rënë pronari i lokalit, shtetasi G. P., 26 vjeç, banues në fshatin Vukpalaj”, njofton policia.

Nga verifikimet ka rezultuar se subjekti nuk ishte i regjistruar në organet kompetente kurse materialet i janë referuar Prokurorisë pranë Gjykatës së Shkallës së Parë Shkodër për veprime të mëtejshme.