Gjendje emergjence në veri të Michiganit për shkak të rritjes së nivelit të ujit në lumin Cheboygan

Autoritetet në Michigan kanë shpallur gjendje emergjence për qarkun Cheboygan, pas rritjes së ndjeshme të nivelit të ujit pranë digës në lumin Cheboygan, një situatë që ka ngritur shqetësime serioze për përmbytje të mundshme në zonat përreth.

Guvernatorja e Michiganit, Gretchen Whitmer, firmosi deklaratën e emergjencës mbrëmjen e së premtes, më 10 prill, pasi reshjet intensive të shiut dhe dëborës kanë bërë që niveli i ujit të rritet brenda 24 orëve deri në vetëm rreth 45 centimetra nën majën e kompleksit të digës Cheboygan.

Sipas deklaratës zyrtare, niveli i lartë i ujit “mund të çojë në përmbytje të mundshme në zonat poshtë digës”, ndërsa paralajmërohet se situata mund të përkeqësohet shpejt nëse reshjet vazhdojnë në ditët në vijim.

Shpallja e emergjencës lejon mobilizimin e burimeve shtetërore për të ndihmuar autoritetet lokale në reagimin dhe menaxhimin e situatës, duke përfshirë koordinimin mes agjencive shtetërore, federale dhe lokale për mbrojtjen e jetës dhe pronës së banorëve.

Reagimi emergjent po koordinohet nga Divizioni i Menaxhimit të Emergjencave dhe Sigurisë Kombëtare pranë Policisë së Shtetit të Michiganit, i cili ka aktivizuar Qendrën Shtetërore të Operacioneve të Emergjencës.

Situata është ndjekur nga afër prej javësh, pasi një stuhi në muajin mars solli deri në 60 centimetra dëborë në këtë qark. Shkrirja e dëborës, e kombinuar me reshje të tjera, ka rritur ndjeshëm rrjedhën e ujit në pellgun ujëmbledhës të liqenit Mullett.

Sipas National Weather Service, liqeni Mullett arriti nivele rekord më 4 prill, duke shtuar rrezikun për përmbytje në të gjithë veriun e Michiganit gjatë kësaj pranvere.

Autoritetet kanë ndërmarrë masa parandaluese, duke vendosur rreth 1,500 thasë me rërë për të forcuar zonën përreth digës. Ndërkohë, kompania Consumers Energy ka dërguar ekipe në terren për të instaluar furnizim të përkohshëm me energji elektrike, që do të ndihmojë në menaxhimin e rrjedhës së ujit përmes pajisjeve shtesë.

Parashikimet e motit nuk janë optimiste. Sipas Shërbimit Kombëtar të Motit, ekziston rrezik për përmbytje lokale që nga fundjava, ndërsa priten stuhi dhe reshje të dendura deri në mesin e javës së ardhshme. Temperaturat më të ngrohta gjithashtu pritet të përshpejtojnë shkrirjen e dëborës, duke rritur më tej presionin mbi sistemin ujor.

“Michigan do të vazhdojë të bashkëpunojë ngushtë me autoritetet lokale. Falënderojmë ekipet e emergjencës që po punojnë për sigurinë e qytetarëve,” u shpreh guvernatorja Whitmer, duke u bërë thirrje banorëve të ndjekin udhëzimet zyrtare dhe të qëndrojnë të informuar.

Autoritetet u bëjnë apel banorëve të zonës së Cheboygan-it të jenë të kujdesshëm dhe të përgatitur për çdo zhvillim të mundshëm, ndërsa situata mbetet në monitorim të vazhdueshëm.