Gjykata e Lartë skeptike ndaj planit të Trump për shtetësinë automatike
Prania e pazakontë e presidentit Donald Trump në Gjykatën e Lartë të SHBA-së të mërkurën nuk duket se ndikoi tek gjyqtarët, të cilët shfaqën skepticizëm të gjerë ndaj përpjekjes së tij për të ndryshuar praktikën e gjatë të shtetësisë automatike për të lindurit në territorin amerikan.
Trump ndoqi nga salla argumentet, ndërsa avokati i qeverisë, John Sauer, mbrojti urdhrin ekzekutiv të presidentit që synon t’u mohojë shtetësinë amerikane fëmijëve të emigrantëve pa dokumente dhe atyre që ndodhen në SHBA me viza të përkohshme.
Gjatë seancës, edhe gjyqtarët konservatorë iu bashkuan atyre liberalë në pyetje të forta ndaj argumenteve të administratës, duke ngritur dyshime për pasojat që do të sillte një ndryshim i tillë në interpretimin e Amendamentit të 14-të të Kushtetutës amerikane.
Kryetari i Gjykatës së Lartë, John Roberts, vuri në dukje se administrata po mbështetej në përjashtime shumë të kufizuara historike për të justifikuar një ndryshim të madh që do të prekte miliona njerëz.
Edhe gjyqtari Samuel Alito, i njohur për qëndrimet e tij konservatore, shprehu shqetësime lidhur me argumentin se fëmijëve të emigrantëve pa dokumente mund t’u mohohej shtetësia për shkak të statusit të prindërve, duke theksuar gjithashtu dimensionin human të çështjes.
Nga ana tjetër, gjyqtari Neil Gorsuch theksoi se në kohën kur u miratua Amendamenti i 14-të në shekullin e 19-të, SHBA nuk kishte ligje të mirëfillta për emigracionin dhe të huajt mund të vendoseshin lirisht në vend.
Administrata Trump argumenton se shtetësia automatike nuk duhet të zbatohet për fëmijët e lindur nga persona që nuk kanë status të ligjshëm të përhershëm në SHBA. Por disa gjyqtarë paralajmëruan se një vendim i tillë mund të krijonte pasiguri edhe për miliona persona që tashmë konsiderohen shtetas amerikanë.
Gjykatësja Amy Coney Barrett ngriti shqetësimin se një ndryshim i rregullit të qartë të zbatuar prej më shumë se një shekulli mund të çonte në konflikte të ndërlikuara ligjore për statusin e prindërve dhe qëllimin e tyre në momentin e lindjes së fëmijës.
Urdhri ekzekutiv i Trump, i nënshkruar në ditën e parë të rikthimit të tij në detyrë, u bllokua menjëherë nga gjykatat federale, të cilat argumentuan se bie ndesh me precedentët e vendosur prej kohësh.
Pas përfundimit të seancës, Trump reagoi në rrjetet sociale duke kritikuar ashpër konceptin e shtetësisë automatike, por komentet e tij nuk duket se gjetën mbështetje të fortë në sallën e gjykatës.
Seanca u zhvillua nën masa të forta sigurie, ndërsa prania e presidentit në sallë u konsiderua e rrallë për një çështje të tillë. Pavarësisht tensioneve politike të fundit, gjyqtarët u shfaqën të qetë dhe të përqendruar në analizën juridike të çështjes.
Vendimi i Gjykatës së Lartë pritet me interes të madh, pasi mund të ketë pasoja të thella për politikën e emigracionit dhe interpretimin e Kushtetutës amerikane në dekadat e ardhshme.
