Gjyqtarja federale refuzon kërkesën e administratës Trump për të mbyllur padinë e NAACP-së kundër xAI-së së Musk
Një gjyqtare federale në Misisipi i ka hedhur poshtë përpjekjen e administratës së presidentit Donald Trump për t’i dhënë fund padisë së grupeve për të drejtat civile kundër kompanisë xAI të Elon Musk, e akuzuar për shkelje të ligjeve mjedisore për të furnizuar me energji një qendër të dhënash të inteligjencës artificiale.
Sipas Reuters, gjyqtarja e qarkut Debra Brown vendosi të hënën se Agjencia për Mbrojtjen e Mjedisit (EPA) mund të ndërhyjë në çështje, por nuk ka autoritet sipas Aktit për Ajrin e Pastër që ta mbyllë njëanshëm padinë pasi i është bashkuar asaj.
Padia u depozitua në prill nga NAACP dhe konferenca e saj shtetërore në Misisipi. Ato pretendojnë se xAI dhe një filial i saj shkelën ligjin federal dhe rregulloret shtetërore duke ndërtuar dhe vënë në punë një central me gaz në Southaven të Misisipit, pa lejet e kërkuara, për të furnizuar qendrën e të dhënave.
Administrata Trump kërkoi në qershor të ndërhynte në emër të EPA-së, duke argumentuar se agjencia mund ta pushonte çështjen sepse rregullatorët federalë kanë autoritet mbi zbatimin e Aktit për Ajrin e Pastër. Brown shkroi se, ndonëse EPA ka të drejtë të ndërhyjë në padi të tilla private, ligji nuk i lejon ta pushojë çështjen nëse nuk po ndjek një veprim të lidhur: “Roli i EPA-së si zbatuese kryesore e Aktit për Ajrin e Pastër nuk do të thotë se qeveria federale ruan kontroll të plotë mbi të gjitha proceset gjyqësore për këtë akt”.
EPA, xAI dhe NAACP nuk iu përgjigjën menjëherë kërkesave për koment, njofton Reuters.
Qendrat e të dhënave që ushqejnë rritjen e inteligjencës artificiale janë bërë një pikë e nxehtë politike në komunitete anembanë vendit, me kundërshtime që bashkojnë votues të prirjeve të ndryshme ideologjike. xAI e Musk përballet edhe me padi të tjera për qendrat e të dhënave dhe konsumin e energjisë; në njërën prej tyre, një grup banorësh të Misisipit pretenduan në qershor se një central që furnizon qendrat e të dhënave po shkakton një zhurmë “të gjithëpranishme dhe të pashmangshme”, që u ka dëmtuar shëndetin dhe vlerën e shtëpive.
