Goditet rrjeti i drogës Detroit–Tennessee: 3 të arrestuar, sekuestruar 11 paund metamfetaminë dhe marijuanë
Një operacion i gjerë kundër trafikut të drogës që lidh Detroitin me shtetin e Tennessee ka çuar në tre arrestime të reja dhe sekuestrimin e një sasie të konsiderueshme droge, ndërsa autoritetet vazhdojnë goditjen ndaj rrjeteve kriminale ndër-shtetërore.
Prokurorët në East Tennessee dhe agjencitë e rendit njoftuan se janë duke intensifikuar përpjekjet për të çmontuar atë që ata e quajnë “korridori i drogës Detroit–Tennessee”, përmes një operacioni të përbashkët të quajtur “313 Initiative”, që synon largimin e drogës, armëve dhe trafikantëve nga rrugët.
Rasti më i fundit ndodhi fundjavën e kaluar në Knoxville, kur njësitë speciale të Sherifit të Knox County, të përqendruara pikërisht në këtë linjë trafiku, tentuan të ndalonin një automjet tip Dodge Caravan. Sipas autoriteteve, drejtuesi i mjetit tentoi të largohej, por pas një ndjekjeje të shkurtër, policia arriti të ndalojë automjetin.
Gjatë kontrollit, u sekuestruan mijëra dollarë në para cash, si dhe rreth 11 paund metamfetaminë dhe marijuanë.
Tre persona përfunduan në pranga:
- Damaino Farris, 21 vjeç, nga Roseville
- James Costner, 41 vjeç, gjithashtu nga Roseville
- Kevin Foy, 33 vjeç, nga Detroit
Sipas dokumenteve gjyqësore, Foy ishte liruar nga burgu më pak se një vit më parë, pasi kishte pranuar fajësinë për akuza të rënda, përfshirë vrasje pa paramendim dhe hyrje me dhunë në banesë në Macomb County.
Të tre të arrestuarit pritet të dalin sërish para gjykatës më 1 prill 2026.
Operacioni “313 Initiative”
Autoritetet theksuan se ky aksion është pjesë e një strategjie më të gjerë, e cila prej vitit 2022 ka dhënë rezultate të dukshme në luftën kundër trafikut të drogës.
Sipas të dhënave zyrtare, që nga dhjetori 2022, operacioni ka arritur të sekvestrojë:
- rreth 145 paund metamfetaminë
- 84 paund fentanyl ose heroinë
- mbi 7 paund kokainë
- mijëra pilula me recetë
- afro 800 mijë dollarë
- dhe 251 armë zjarri
Në total janë kryer 453 arrestime.
Prokurorja e qarkut Knox, Charme Allen, deklaroi se ky operacion ka ndikuar drejtpërdrejt në uljen e numrit të vdekjeve nga mbidozat.
“Në Knox County, puna e këtij operacioni ka kontribuar në uljen e vdekjeve nga mbidozat nga 485 në vitin 2023 në 301 në vitin 2024. Kjo do të thotë 184 jetë të shpëtuara,” u shpreh ajo.
Edhe zonat përreth kanë raportuar përmirësime të ndjeshme, me një ulje prej 57% të vdekjeve nga mbidozat në disa juridiksione gjatë vitit 2024.
Bashkëpunim i gjerë ndër-agjencish
Operacioni përfshin një numër të madh agjencish federale, shtetërore dhe lokale, përfshirë FBI-në, DEA-n, Policinë e Shtetit të Michiganit dhe Departamentin e Policisë së Detroitit, si dhe struktura të shumta në Tennessee dhe shtete të tjera.
Autoritetet theksojnë se ky bashkëpunim është thelbësor për të goditur rrjetet që operojnë përtej kufijve shtetërorë dhe për të ndaluar shpërndarjen e drogës në shkallë të gjerë.
Ky rast i fundit është një tjetër dëshmi se trafiku i drogës nga zona e Detroitit mbetet një sfidë serioze për sigurinë publike, por edhe se përpjekjet e koordinuara po japin rezultate konkrete në mbrojtjen e komuniteteve.
