Hoxha pret ambasadorin e ri të SHBA-ve: Forcim i partneritetit strategjik dhe zgjerim i bashkëpunimit ekonomik

Ministri për Evropën dhe Punët e Jashtme, Ferit Hoxha, ka pritur në një takim të parë ambasadorin e ri të Shteteve të Bashkuara në Shqipëri, Eric Wendt, duke vënë theksin te forcimi i mëtejshëm i marrëdhënieve strategjike mes dy vendeve.

Përmes një postimi në rrjetin social X, Hoxha e cilësoi takimin si një kënaqësi të veçantë dhe nënvizoi rëndësinë e partneritetit shqiptaro-amerikan, të mbështetur, sipas tij, në vlera të përbashkëta demokratike, bashkëpunimin në kuadër të NATO-s dhe lidhjet historike mes dy popujve.

“Pres të punojmë ngushtë së bashku për të thelluar më tej marrëdhëniet tona dypalëshe”, shkroi Hoxha, duke veçuar zgjerimin e mundësive ekonomike dhe të investimeve si një prej fushave ku pritet të intensifikohet bashkëpunimi.

Në fokus të bisedimeve pritet të jetë edhe bashkëpunimi për sigurinë dhe stabilitetin në rajon, si dhe koordinimi për përballimin e sfidave globale.

Hoxha theksoi gjithashtu se anëtarësimi i Shqipërisë në Bashkimin Evropian mbetet përparësia kryesore kombëtare, ndërsa e cilësoi partneritetin transatlantik si një komponent të rëndësishëm të kësaj qasjeje.

“Për Shqipërinë, anëtarësimi në Bashkimin Evropian, si përparësia jonë kryesore kombëtare, dhe një partneritet i fortë e i qëndrueshëm transatlantik janë dy anë të së njëjtës medalje”, u shpreh ministri.

Në përfundim, Hoxha i uroi ambasadorit Wendt sukses në misionin e tij në Shqipëri dhe shprehu pritshmërinë për një bashkëpunim të afërt, produktiv dhe të qëndrueshëm mes dy vendeve.

Ende nuk ka komente. Bëhuni i pari që komenton.