Ish-drejtori i një shkolle në Atlanta u pensionua, por u rikthye si mirëmbajtës në të njëjtën shkollë
David White, 58 vjeç, u tërhoq nga puna në shtator 2025 pas një karriere 33-vjeçare në arsim, prej të cilave 15 vite shërbeu si drejtues i Burgess-Peterson Academy, një shkollë fillore në Atlanta. Gjatë karrierës së tij ai është njohur edhe si Drejtori i Vitit për sistemin e shkollave publike të Atlantës.
White tha se e kishte parë pensionimin si një periudhë të qetë dhe të këndshme, por shumë shpejt ndjeu mungesën e komunitetit shkollor dhe vetminë kur qëndronte në shtëpi. Kur u hap një vend i ri si site manager në të njëjtën shkollë, ai aplikoi menjëherë, raporton CBS News. Holly Brookins, drejtoresha e re e Burgess-Peterson, e mbështeti vendimin e tij për t’u rikthyer në një rol joakademik.
Roli i tij zyrtar është menaxher i vendit, por në praktikë White kryen detyra pune dore: pastron me presion tualetet, kontrollon aparatet e fikjes së zjarrit, pastron kanalizimet e kulmeve dhe merret me riparime të ndryshme. Ai thotë se nuk i intereson hierarkia; për të rëndësi ka të kontribuosh në mënyrë të dobishme për shkollën që e do.
Megjithëse nuk është më në krye të administratës, White ndjehet i plotësuar nga puna që bën dhe e sheh rolit e tij praktik si një mënyrë për të mbajtur lidhjen me nxënësit dhe stafin; ai konsideron se edhe pozicionet më të thjeshta kanë vlerë, sipas CBS News.
